L'illustratur ed autur genevrin Martin Panchaud ha survegnì il premi da cudeschs per uffants e giuvenils 2021 ch'è dotà cun 10'000 francs.
Sia «Graphic Novel» cun il titel«Die Farbe der Dinge» lascha girar en crusch ed en travers las disas dal public quai che pertutga texts e maletgs, scriva la giuria. Las figuras èn rudels da pliras colurs ch'èn colliads tras stritgs fins cun dialogs. Tranteren chatt'ins infograficas, survistas e parts da cartas. Il premi è vegnì surdà a chaschun dals Dis da litteratura da Soloturn.
Dis da litteratura virtuals
Era quest onn han ils Dis da litteratura a Soloturn lieu sur tut online: quai dals 12 fin 16 da matg 2021. Dentant, almain 10 occurrenzas èn questa giada cun public. Tut en tut porschan ils Dis da litteratura var 100 prelecziuns e discussiuns. Var 80 auturas ed auturs sco era giasts internaziunals èn da la partida. L'onn passà era l'entira purschida online stada gratuita. Quest onn ston ins pajar per la purschida, pia ins sto cumprar bigliets per pudair guardar ni tadlar.
Duas rumantschas
Tranter quels e quellas che prelegian èn era duas rumantschas: Viola Cadruvi e Gianna Olinda Cadonau. Omadus han gia publitgà cudeschs. E da temp en temp pon ins era tadlar ellas en la rubrica Impuls tar RTR.
