- Il Cussegl federal refusa l’iniziativa dal pievel «Gea a taglias federalas gistas era per pèrs maridads» da la partida dal Center, e quai senza cuntraproposta.
- L'iniziativa saja il cuntrari dal project per la taglia individuala, elavurada dal Cussegl federal sin incumbensa dal parlament.
- Vitiers è il Cussegl federal cunter l'iniziativa dal pievel « Gea a rentas AVS gistas». Per rentas cumplainas per omadus conjugals manchian a l'AVS ils daners.
Il Cussegl federal ha tenor sia communicaziun la finamira d'eliminar la discriminaziun da pèrs maridads tar la taglia. El refusa dentant l'iniziativa ord pliras raschuns. Uschia liquideschia l'iniziativa bain ils custs pli auts per pèrs maridads, na mainia dentant betg ad ina neutralitad dal stadi civil. Quai cuntrari a la taglia individuala.
Pli gronds dischavantatgs èn pussaivels per pèrs en concubinat
«Tut tenor constellaziun vegniss la discriminaziun actuala da pèrs en concubinat envers pèrs maridads, che han la medema situaziun economica – restar u perfin daventar pli gronda» ha constatà la ministra da finanzas Karin Keller-Sutter avant las medias a Berna.
Da l'autra vart vegniss in splitting cumplain bain ad ademplir las pretensiuns da l'iniziativa, manegia il Cussegl federal. Il pretsch fiss dentant che persunas en concubinat avess en cumparegliaziun da pajar relativamain bler taglia.
Pudess manar a damain entradas da fin ad 1,4 milliardas francs
Vegniss il Cussegl federal a realisar l'iniziativa provisoricamain, cun agid d'ina ordinaziun ed in quint da taglia alternativ – fiss el lià ad ina tariffa vertenta ed a las deducziuns per pèrs en concubinat. En quest cas quinta il departament cun damain entradas annualas, dad annualmain 700 milliuns fin 1,4 milliardas francs. Questas entradas che crodan davent sentiss da principi la Confederaziun. Damai ch'ils chantuns sa participeschan vi da las entradas da la taglia federala directa, vegniss radund in tschintgavel da la reducziun d'entradas ir sin donn e cust dals chantuns.
Recept per l'AVS n'è tenor il Cussegl federal betg da finanziar
Silsuenter ha cussegliera federala Elisabeth Baume-Schneider declerà la posiziun negativa tar l'iniziativa dal pievel «Gea a rentas d'AVS gistas». Stuess la Confederaziun pajar duas rentas cumplainas, custass quai a l'AVS 3,6 milliardas francs l'onn 2030.
Engrevgiar l'AVS anc pli fitg suenter la 13avla renta che vegn pajada davent dal 2026, na po betg esser.
Pli tard pudessan ils custs anc esser pli auts. L'iniziativa na fetschia dentant nagina proposta co curclar quests custs, e l'AVS n'haja betg ils meds per surpigliar quai – crititgescha il Cussegl federal. Per finanziar duas rentas per pèrs maridads stuess ins auzar las contribuziuns da las pajas ubain la taglia sin la plivalur. Sco proxim ha il parlament a Berna da prender posiziun davart las duas iniziativas dal Center.
