Tgi ch'è maridà na duai en il futur betg pli vegnir discriminà sch'i va per las taglias e las rentas da l'AVS. Quai pretendan duas iniziativas dal pievel da l'Allianza dal Center AdC. Ella haja surdà a Berna las iniziativas cun 102'355, respectivamain 105'931 suttascripziuns valaivlas, scriva la partida. Las duas iniziativas cun ils nums «Gea a taglias fairas» e «Gea a rentas d'AVS fairas» han sco finamira da curreger l'ingiustia che pertutga pèrs maridads e pèrs che vivan en in partenadi registrà.
L'ingiustia fiscala duai svanir
Actualmain ston pèrs maridads e pèrs che vivan en in partenadi registrà pajar dapli taglia federala che pèrs en concubinat. L'iniziativa da l'AdC pretenda perquai che pèrs maridads survegnan, sper il quint communabel per la taglia federala, in quint da taglia alternativ. Quel duai resguardar la tariffa e las reducziuns per pèrs betg maridads. Ils pèrs duain alura pajar il quint pli bass. L'imposiziun da taglia communabla vul l'AdC mantegnair.
Tenor la Confederaziun eran l'onn 2019 pertutgads da l'uschenumnada puniziun da la maridaglia radund 454'000 pèrs maridads cun gudogn dubel e var 250'000 pèrs maridads en renta.
Il Tribunal federal aveva gia constatà l'onn 1984 che la discriminaziun fiscala da pèrs maridads e pèrs che vivan en in partenadi registrà cuntrafetschia a la constituziun. D'abolir quest chasti è perquai era dapi onns tema en la politica.
Rentas fairas per tut ils pèrs
L'Allianza da Center vul er abolir la discriminaziun da pèrs maridads tar l'AVS. Da reducir las rentas per pèrs maridads na duai en il futur betg pli esser lubì.
Ozendi survegnan pèrs maridads ina renta communabla. Quai vul dir ensemen survegnan els maximalmain ina summa che correspunda ad 1,5 giadas la renta maximala singula. Per pèrs betg maridads datti percunter duas rentas.
Plan dal Cussegl federal è dispitaivel
Il pli sisum en l'agenda dal Cussegl federal e dal parlament è entant l'imposiziun da taglia individuala. Ina proposta dispitaivla. Questa proposta vul reparter las entradas e la facultad da pèrs maridads tenor las relaziuns da dretg civil, sco quai ch'i vegn actualmain fatg gia tar pèrs betg maridads.
L'imposiziun da taglia individuala è previsa sin tut ils plauns statals. Decider en chaussa sto sco proxim il parlament.
La maioritad da las partidas vesa però a moda critica la proposta dal Cussegl federal. Questa midada radicala dal sistem haja per consequenza novas ingiustias, uschia il tenor suenter la consultaziun. Sulettamain la Partida liberaldemocratica svizra, la Partida verd-liberala e l'economia sustegnan la proposta.
La speranza dal Cussegl federal è che l'imposiziun da taglia individuala mainia al fatg che dapli persunas maridadas cumenzan a lavurar u auzan lur pensum da lavur.
