Siglir tar il cuntegn

Header

cuntegn

Distribuziun Weko scumonda a la Posta da surpigliar la gruppa Quickmail

La Posta svizra na dastga betg surpigliar la gruppa Quickmail. Quai ha decis la cumissiun da concurrenza Weko. Cun la surpigliada da l'interpresa da logistica na dessi betg pli ina concurrenza tar tschertas spediziuns da brevs en massa, uschia l'argumentaziun da la WEKO. Ultra da quai dettia quai anc in'autra interpresa ch'haja interess da cumprar la gruppa Quickmail ed uschia in'alternativa pli favuraivla per la concurrenza.

Posta fiss memia dominanta en il martgà

In'examinaziun pli profunda haja mussà che la surpigliada eliminass la concurrenza en il martgà per spediziuns da brevs en massa adressadas sur 50 grams per clients da fatschenta, ha la Weko communitgà. Plinavant saja la Posta lura er en auters secturs memia dominanta, per exempel tar la distribuziun da gasettas e revistas.

La gruppa Quickmail aveva argumentà ch'i na saja economicamain betg pli pussaivel da manar vinavant il manaschi autonom pervi da cifras cotschnas. Quai saja stà cler a la Weko tar lur decisiun. Ina surpigliada da la sanaziun avess ins dentant be pudì lubir, sch'i fiss tuttina stà da quintar che Quickmail svaneschia dal martgà – ed ina midada dals clients tar la Posta. Quai na saja dentant betg il cas, perquai ch'er in'autra interpresa s'interesseschia per Quickmail.

RTR novitads 09:00

Artitgels legids il pli savens