Siglir tar il cuntegn

Header

cuntegn

Donaziuns d'organs Swisstransplant sistescha register per donaziuns d'organs

La fundaziun Swisstransplant ha sistì ses register per donaziuns d'organs. Ospitals n'han uschia nagin access pli a las datas, ha Swisstransplant communitgà. Persunas ch'èn s'inscrittas en il register vegnian infurmadas uschè svelt sco pussibel davart las pussaivladads da documentar lur veglia.

Swisstransplant cusseglia dad uschè u uschia documentar a scrit u infurmar la parentella sch'ins vul dar ses organs, independent da la varianta anc actuala u il model dal consentiment presumà che vegn. Actualmain dettia per far quai la carta per donaziuns d'organs, la disposiziun dal pazient u il dossier da pazients electronic. Quai distgargia la parentella en il cas da mortori.

Register cun problems da segirezza

Il register naziunal per donaziuns d'organs era vegnì installà il 2018 ed è dapi il schaner da quest onn stà offline. L'incumbensà federal per la protecziun da datas e per la transparenza era vegnì en acziun perquai che l'emissiun «Kassensturz» da SRF aveva scuvert che la plattafurma n'è betg segira. Igl era pussaivel da registrar ina persuna sin la plattafurma, senza che quella sa quai.

Swisstransplant ha lura serrà la pussaivladad da sa registrar e lura mess online ina versiun pli segira. Suenter ch'els han gì schlià il problem, ha Swisstransplant oriund vulì manar vinavant il register. Planisà era da manar vinavant il register enfin ch'il nov, da la Confederaziun vegnia en funcziun, tenor la nova lescha.

L'incumbensà ha confermà che Sisstransplant haja eliminà las mancanzas e realisà la pli gronda part da las recumandaziuns. Cun sistir il register na saja quai dentant betg pli relevant.

Nov register fin 2024

Cun la lescha da transplantaziun approvada ils 15 da matg, vegn introducì il model da consentiment presumà. Quai chaschuna er ch'i dovra in register federal enfin il 2024. Cun il nov model daventa principalmain mintgin u mintgina in donatur d'organs. Tgi che na vul betg quai, sto far cler quai a moda activa durant sia vita. Questa cuntradicziun vegn lura purtada en il register.

audio
Per tadlar: las novitads da las 12:00
ord RTR Audio dals 20.10.2022.
laschar ir. Durada: 5 minutas.

RTR novitads 12:00

Artitgels legids il pli savens