Ils chantuns da la Svizra orientala, tranter quels er il Grischun, pretendan in stop tar il dossier da pazients electronic, uschia hai num en ina communicaziun communabla. La lescha è en vigur dapi il 2017 e dapi il 2020 lianta per tut las purschidras da prestaziuns staziunaras.
Ussa vul il Cussegl federal reveder la lescha. Ils chantuns da la Svizra orientala pretendan però che la Confederaziun stoppia sco emprim schliar ils problems essenzials dal dossier da pazients electronic avant ch'il parlament decidia davart ina finanziaziun supplementara. Ils chantuns teman che la revisiun auzass las premias da cassas da malsauns, ed il process da la digitalisaziun na vegnia betg sustegnì, sch'ils problems da basa na sajan betg schliads.
Problems dal dossier tenor ils chantuns
- Il dossier sa basia sin vegls formats da datas, sco pdfs e purtrets, e betg per exempel sin datas da pressiun da saun.
- La populaziun na vesia para nagin niz en il dossier.
- Damai che pazientas e pazients pon mussar u zuppentar mintga malsogna envers las purschidras, vegn il niz dal dossier fatg empaglia.
- Per purschidras ambulantas saja il dossier voluntari, quai fraina il process da la digitalisaziun.
- Tranter «cuminanzas da tschep» na dettia betg ina communicaziun cumplessiva.
Ils chantuns vulan ch'i vegn pir decis davart ina finanziaziun supplementara per il dossier electronic, cura che quels problems da basa sajan schliads. Las propostas duain vegnir refusadas, cun l'incumbensa al Cussegl federal d'elavurar in messadi che tracta ils problems da basa.
