Sco l'onn 2020 èn ils dumbers da cas da l’autoritad per la protecziun da l'uffant e da creschids KESB muntads. En vista da la creschientscha demografica saja quest augment betg remartgabel, scriva la Conferenza per la protecziun da l’uffant e da creschids.
La fin dal 2021 valeva en l’entira Svizra per passa 145'416 persunas ina mesira da protecziun. Radund dus terzs dals cas (100'569) hajan pertutgà creschids, quai saja in augment da 2,5%. La KESB sustegnia surtut persunas cun problems psichics u cun difficultads cun il diever da raps u cun l'administraziun.
In terz dals cas cun minorens e minorennas
In terz dals cas haja pertutgà minorens e minorennas (44'823), in augment da 3%. En 81% da quests cas cusseglia in procuratur u ina procuratura geniturs en dumondas d'educaziun, en dumondas da tgira per geniturs che han dispita u en ch'els procuraturs represchentan ils interess d'in uffant en process d'aliments.
11 % da tut las mesiras per la protecziun per uffants pertutgian plazzaments en in lieu ester u en ina famiglia da tgira. Quels succedan, sche geniturs maltractan lur uffants u na pon betg proveder en moda fidaivla pervia d'in disturbi psichic u pervia d'ina malsogna da dependenza. Quatter da tschintg da tut las mesiras sajan vegnidas prendidas en enclegientscha vicendaivla.
