La banca UBS ha augmentà il gudogn per 5% sin 2,1 milliardas dollars il segund quartal da l’onn – cumpareglià cun la medema perioda da l'onn passà. Tranter auter er perquai ch’ella haja vendì ina participaziun en il Giapun per passa 800 milliuns. Quai ha communitgà la banca gronda. I sa tractia dal pli grond gudogn dapi 10 onns durant in segund quartal da l’onn.
Tuttina n’ha la banca betg ademplì las spetgas dals analists. Cunzunt saja la facultad administrada sa reducida marcantamain pervi dal svilup negativ als martgads da finanzas. Las prognosas per ils proxims mais èn levet optimisticas. La UBS veglia vinavant cumprar enavos atgnas aczias per radund 5 milliardas dollars fin la fin da l’onn, ha ditg il CEO Ralph Hamers.
