Damai ch’adina dapli dunnas restan senza uffants, pretendan economs ed economas uss ina renta da l’AVS che saja dependenta dal dumber dals agens uffants. Quai rapporta la «NZZ am Sonntag». In tal sistem fiss pli gist e procurass per dapli persistenza finanziala da l’Assicuranza per vegls e survivents. Quai manegian almain ils economs e las economas.
Persunas cun buna paja, ma senza uffants, duajan survegnir pli pauc
En la «NZZ am Sonntag» discurra l'econom Wolfram Kägi dad in sbagl da construcziun da l’AVS. Actualmain ignoreschia quella numnadamain il fatg ch’i na dettia en l’avegnir naginas rentas pli senza uffants. En consequenza propona Kägi tranter auter che persunas senza uffants, ma cun ina buna paja, duajan be pli survegnir la mesadad da la renta da l’AVS. Questa mesira meglierass er la persistenza da l’AVS uschia l’econom. Betg intgantada da questa idea n'è l’organisaziun «Pro Single Svizra». La presidenta da l’organisaziun, Sylvia Locher, ha numnà questa proposta en la «NZZ am Sonntag» – citat: «ina tuppadad». Persunas senza uffants engrevgeschian numnadamain pli pauc l’infrastructura ed il sistem social.
Be mintga quarta dunna ha ozendi uffants
Mez dals onns 1960 ha tenor la Confederaziun ina dunna parturì en media passa 2,5 uffants. L’onn passà haja quest dumber anc muntà a 1,39. Tenor datas da l’universitad da Losanna n’ha mintga quarta dunna ozendi nagins uffants. En quest connex di Valérie-Anne Rysler da l’universitad da Losanna ch’il model da famiglia tradiziunal haja pers sia muntada.
