A Berna èn tschients da dunnas idas sin via per protestar cunter auzar la vegliadetgna da pensiun da las dunnas sin 65 onns. Il Gea da la populaziun svizra da dumengia saja in grond pass enavos puncto egualitad. Appellà a l'acziun da protest sin la plazza da la staziun han las dunnas da la PS svizra cun las co-presidentas Tamara Funiciello e Martine Docourt. Umens ritgs, vegls ed alvs hajan decis che las dunnas duain lavurar pli ditg. L'acziun da protesta saja l'emprima «annunzia da cumbat» cunter quels umens.
Emprimas datas conferman foss tranter schlattainas
Suenter il stgars Gea dal suveran svizzer a la refurma da l'AVS mussan emprimas datas l'uschenumnà foss tranter las schlattainas: Las dunnas han refusà la refurma - ils umens han acceptà quella. L'effect saja cleramain visibel, di la politologa Cloé Jans da l'institut da perscrutaziun gfs.berna. Er l'orientaziun politica e la vegliadetgna da las dunnas hajan giugà ina rolla. La refurma da l'AVS è vegnida approvada la dumengia cun 50,2% da las vuschs.
