Siglir tar il cuntegn

Header

cuntegn

Auzament vegliadetgna pensiun Piz a cup: Dunnas ston lavurar fin 65 onns

Auter ch'en il chantun Grischun è il resultat da l'auzament da la vegliadetgna da pensiun stgarsischem: 50.6%

AVS 21: Auzar la vegliadetgna da pensiun

Svizra: AVS 21: Auzar la vegliadetgna da pensiun

  • GEA

    50.6%

    1'443'075 Vuschs

  • NA

    49.4%

    1'410'759 Vuschs

Funtauna gfs.berna

Avrir la box Serrar la box

Las calculaziuns approximativas fa l'institut da perscrutaziun gfs.berna sin incumbensa da l'entira SRG SSR. Quellas sa basan sin vischnancas da referenza che tramettan al team da gfs.berna lur resultats finals. La quota da sbagls munta a +/- 3,0 puncts procentuals.

En Svizra è la refurma da l'AVS 21 gartegiada: Stgarsischem è la proposta d'auzar la vegliadetgna da las dunnas sin 65 onns, sco tar ils umens, vegnida approvada. Cunquai che l'augment da la taglia sin plivalur è era acceptà (là pli cleramain) po l'entira revisiun da l'AVS 21 ussa ir en vigur.

Las reacziuns

Contrahentas ed aderentas vesan il resultat stgars e pretendan omadus ch'i saja ussa da procurar per gistadad en la segunda pitga cun refurmar la lescha davart la prevenziun professiunala.

audio
Gea a refurma AVS: Reacziun Sandra Locher ed Anna Giacometti
ord Actualitad dals 25.09.2022.
laschar ir. Durada: 4 minutas 30 Secundas.

Grischun di Gea a la refurma da l'AVS

En il Grischun è la revisiun da l'AVS 21 acceptada in tant pli cleramain: La proposta d'auzar la vegliadetgna da pensiun da las dunnas è acceptada cun 56.19% da las votantas e dals votants. E cunquai che l'augment da la taglia sin plivalur en favur da l'AVS è era acceptà, approva il suveran grischun uschia la refurma da l'AVS 21.

Grischun: AVS 21: Auzar la vegliadetgna da pensiun

GEA 56.19%, Na 43.81%

Resultat 

Funtauna votaziuns GR

Avrir la box Serrar la box

RTR sa basa sin las datas che la Chanzlia chantunala dal Grischun metta a disposiziun. Quellas èn da chattar sin https://abstimmungen.gr.ch/.

Per tge ch'i va

Las contribuziuns che Svizras e Svizzers pajan a l’Assicuranza da vegls e survivents na bastan en l’avegnir betg per pajar las rentas a persunas che van en pensiun. Perquai ha proponì la Confederaziun cun la refurma «AVS 21» da stabilisar l'AVS cun spargnar extradas e generar dapli entradas.

Per l'ina vegnan las dunnas a lavurar in onn pli ditg – pia enfin 65 onns sco ils umens. Questa midada vegn introducida en quatter pass a partir da l'onn 2025, e las emprimas annadas pertutgadas survegnan ina gulivaziun en furma da daners. Plinavant daventa il pensiunament pli flexibel: Umens e dunnas pon decider d'ir en pensiun tranter 63 e 70 onns. Ma perquai che las entradas be da quai na tanschan betg, vegn era la taglia sin la plivalur auzada.

RTR novitads 12:00+

Artitgels legids il pli savens