Sandra Baltermia da l'Allianza dal Center era fitg cuntenta cura ch'il resultat era qua. Dentant saja stà fitg stretg ed in cler messadi da las dunnas cun ils sur 49% ch'han ditg Na, co ella di vinavant. Ed ella haja era chapientscha per quai. I saja cler ch'i stoppia uss capitar in meglierament per las dunnas, cunzunt quai che pertutga ils pajaments ch'ins survegn tar la pensiun ed er en spezial la refurma da la cassa da pensiun.
Nora Kaiser da la partida sozialdemocratica sin l'autra vart ha sperà sin in Na. Il resultat haja dentant mussà che las dunnas na veglian betg ina scursanida da las rentas. Tenor ella stoppians uss prender quest resultat en il Cussegl naziunal e discutar co ir vinavant cun l'AVS e la secunda pitga. Là èn Baltermia e Kaiser d'accord. Ellas vesan omaduas malgistadad tar las dunnas e che quella duai vegnir eliminada.
Alain Berset: «Igl è in simbol da solidaritad»
Il Cussegl federal prendia enconuschientscha dal resultat pertutgant la revisiun da l'AVS cun gronda modestadad. Quai ha punctuà il cusseglier federal Alain Berset avant las medias. Pertutgant il resultat fitg stgars tar l'auzament da la vegliadetgna da pensiun tar las dunnas e la flexibilisaziun, stoppian ins ussa era resguardar ina gronda minoritad. Quest pass da stabilisaziun saja bain impurtant, na schlia però betg tut ils problems.
Ultra da quai dovria quai ussa urgentamain era ina revisiun da la segunda pitg – pia las cassas da pensiun.
Las reacziuns differeschan
Il gea a la refurma da l'AVS 21 n'è betg uschè cler. Entant che l'auzament da la taglia sin la plivalur n'è apparentamain betg stà uschè dispitaivel tar las votantas ed ils votants (55,1% Gea) è l'auzament da la vegliadetgna da pensiun e felxibilisaziun da la vegliadetgna stà fitg stgars cun 50,6% Gea.
Contrahentas ed aderentas vesan il resultat stgars e pretendan omadus ch'i saja ussa da procurar per gistadad en la segunda pitga cun refurmar la lescha davart la prevenziun professiunala.
