- En 24 chantuns èn vegnids elegids il cussegliers e las cusseglieras dals chantuns.
- Fin ussa èn vegnids elegids 31 dals 46 sezs (PS: 5, Verds: 3, AdC: 10, PLD: 9, PPS: 4)
- Segunds scrutinis datti en ils chantuns: Argovia, Berna, Friburg, Genevra, Schaffusa, Soloturn, Tessin, Vad, Valais e Turitg. Ils segunds scrutinis èn tranter ils 12 e 26 da november.
Ils resultats da las elecziuns na mussan per gronda part sco spetgà betg grondas surpraisas. Sco er en il Grischun èn vegnids reelegids per gronda part ils cussegliers e las cusseglieras en uffizi senza problems. Surpraisas hai dà en il chantun da Sviz ed a Neuchâtel.
Chiesa sto ir en la segunda runda
Il president da la PPS Marco Chiesa ha fatg las pli bleras vuschs en il Tessin cun 39'024 vuschs. Per il pli absolut han dentant mancà baud 13'000 vuschs. Cun quai va el sco favurit en il segund scrutini. Las segund bleras vuschs ha fatg Fabio Regazzi da l'AdC davant Alex Farinelli da la PLD.
A Petra Gössi gartegia surpraisa
L'anteriura presidenta da la PLD svizra è vegnida elegida sco emprima dunna en la chombra pitschna cun las pli bleras vuschs dal chantun Sviz. Sper Gössi è er Pirmin Schwander da la PPS vegnì elegì nov en il Cussegl dals chantuns. Othmar Reichmuth da l'AdC, ha cuntanschì il pli absolut, ma fatg var 3'000 vuschs damain che Schwander ed ha cun quai manchentà sia reelecziun.
A Neuchâtel gudogna nunspetgadamain la sanestra omadus sezs. Sper la cussegliera en uffizi Céline Vara dals Verds ha Baptiste Hurni da la PS battì il cusseglier dals chantuns Philippe Bauer da la PLD.
Segund scrutinis per segunds sezs en plirs chantuns
A Turitg è Daniel Jositsch vegnì reelegì en l'emprim scrutini cun 236'775 vuschs. Ils segund sez vegn decis en il segund scrutini. Las pli bleras vuschs ha fatg Gregor Rutz da la PPS.
A Genevra n'ha nagin candidat cuntanschì il pli absolut. Mauro Poggia dal Mouvement Citoyen Genevois ha dentant fatg las pli bleras vuschs (36'898). Cun quai ha el fatg dapli vuschs ch'il cusseglier en uffizi da la PS Carlo Sommaruga (34'982) e la cussegliera en uffizi dals Verds Lisa Mazzone.
A Soloturn è Primin Bischof (AdC) vegnì reelegì. Franziska Roth (PS) e Christian Imark (PPS) han manchentà il pli absolut. En il chantun Friburg n'ha nagin cuntanschì il pli absolut. Las pli bleras vuschs han fatg Isabelle Chassot (en uffizi, AdC) e Johannas Gapany (en uffizi, PLD).
Ils segunds scrutinis vegnan ad avair lieu tranter ils 12 ed ils 26 da november.
Thomas Minder sto tremblar a Schaffusa
A Schaffusa è il favurit da la PPS Hannes Germann vegnì elegì cun 15'490 vuschs. Per il segund sez datti in segund scrutini. Il cusseglier en uffizi Thomas Minder (senza partida), ch'è enconuschent sin nivel naziunal tranter auter per l'iniziativa «Cunter las remuneraziuns abusivas», ha fatg las terz pli bleras vuschs en l'emprim scrutini (12'045 vuschs), Simon Stocker da la PS è vegnì segund cun 13'456 vuschs, ha dentant manchentà il pli absolut da 13'939 vuschs.
Dumengia lucca per Erich Ettlin e Daniel Fässler
Gia avant il di d'elecziuns è il represchentant dal chantun Sursilvania Erich Ettlin (AdC) vegnì reelegì. Cun quai che nagin cuntracandidat u cuntracandidata è s'annunziada, è il politicher da la partida da l'Allianza dal Center vegnì elegì senza scrutini ils 4 da settember. Appenzell Dadens elegia tradiziunalmain il cusseglier u la cussegliera dals chantuns a cumin. Daniel Fässler (AdC) è vegnì elegì gia l'avrigl per il Cussegl dals chantuns.
