Radund 8% da la populaziun americana n'ha nagina segirada (20-30 milliuns dals abitants). Quai èn persunas nua ch'il patrun na paja betg la cassa da malsauns, persunas che na san uschia betg prestar ina segirada u era immigrants ch'èn illegal en ils Stadis Unids.
Il sistem da sanadad chaschuna blers problems e confusiuns.
John Emanuel Gartmann (68) è oriund da Castrisch, abita uss dentant gia dapi fitg blers onns a New York City. Persunalmain è el dentant cuntent cun ses provediment. El haja duas segiradas:
- La segirada da basa vegn pajada entras ses patrun
- La segirada supplementara paja el (radund 6'000 francs per onn)
Var 170 milliuns dals Americans (bun 50% da la populaziun) èn segirads entras il patrun. Betg tuts han dentant quai desideri. Per John Emanuel Gartmann saja il sistem american perquai betg gists.
«Era jau hai gì cletg»
Claudius Vincenz (59) viva dapi var trais decennis en il stadi da Michigan. Era el è fitg cuntent cun sia segirada. Ses patrun, l'universitad d'Ann Arbor surpiglia tut ils custs da segirada. Quai saja 250 fin 300 francs per mais, raquinta el.
Jau na paj nagina segirada. Quai è inclus en la paja.
Era tenor el na saja il sistem betg gist. I fiss la lavur dals politichers a Washington da meglierar la situaziun per la populaziun. Uschia che davaira tut ils radund 330 milliuns abitants pudessan prestar ina cassa da malsauns.
RR actualitad 08:00