Sco gia l'onn 2019 ha Stefan Engler recaltgà las pli bleras vuschs. 38'316 Grischuns e Grischunas han dà lur vusch al politicher da l'Allianza dal Center. Per el èsi in bun signal ch'el ha era survegnì vuschs da las autras partidas. En ses onn probabel sco president dal Cussegl dals chantuns vul el metter grond pais sin il service public.
Cun damain vuschs ch'Engler è era Martin Schmid vegnì reelegì. Ad el han 33'611 dals electurs e las electuras mussà la confidenza. Il politicher da la Partida liberaldeocratica è cuntent cun il resultat. Il resultat saja en vista istorica schizunt «excellent». Els hajan l'incumbensa da s'engaschar per il chantun e quai fetschian Engler e Schmid fin uss e vegnian els er a far vinavant.
Il candidat independent
Il candidat independent per il Cussegl dals chantuns, Hans Vetsch, n'è betg trumpà dal resultat. El ha be recaltgà 5’723 vuschs ed uschia gì nagina schanza cunter ils cussegliers en uffizi. El n'haja mai quintà ch'el pudessi vegnir elegì en la Chombra pitschna. Sia candidatura saja davent da l’entschatta stada per dar ina schelta.
Tuttina crititgescha el en l'intervista fermamain ils dus cussegliers dals chantuns en uffizi. Tranter auter saja lur candidatura in chaussa fatga gia oravant e ch'els lavurian cunzunt per ils interess en il rom da lur mandats pajads. La politica cun tants mandats saja delicat per la democrazia e na mainia betg a midadas.
