46 sezs èn d’occupar en il Cussegl dals chantuns. Da quels èn 33 gia occupads suenter las elecziuns federalas dals 22 d'october. Dals 13, ch'eran anc vacants, èn set vegnids occupads ils 12 da november. Ils ultims sis èn vegnids occupads oz.
Il resultats dals segunds scrutinis dals 19 da november:
- Argovia: Marianne Binder-Keller (nov, AdC)
- Schaffusa: Simon Stocker (nov, PS)
- Soloturn: Franziska Roth (nova, PS)
- Tessin: Fabio Regazzi (nov, AdC), Marco Chiesa (en uffizi, PPS)
- Turitg: Tiana Angelina Moser (nova, PVL)
- En il chantun Argovia ha la cussegliera naziunala Marianne Binder-Keller gudagnà in sez dal Cussegl dals chantuns per l'Allianza dal Center suenter 28 onns. Il cusseglier naziunal da la PPS, Benjamin Giezendanner, è vegnì stgars en l'elecziun decisiva. Cunquai ha la partida la pli ferma en il chantun Argovia pers ses sez.
PPS perda sez da l'Argovia
Minder sto ir suenter 12 onns
Simon Stocker (PS) ha gudagnà il segund scrutini da las elecziuns per il Cussegl dals chantuns a Schaffusa. El è sa mess atras cunter il cusseglier dals chantuns Thomas Minder (senza partida) ch'è en uffizi dapi il 2011.
Franziska Roth defenda sez da la PS en il Soloturn
La cussegliera naziunala Franziska Roth (PS) ha decidì il cumbat per il segund sez dal Cussegl dals chantuns da Soloturn per ella. La giuvna da 57 onns po uschia succeder a Roberto Zanetti (PS). Ses concurrent Christian Imark (PPS) ha ella laschà cleramain davos ella.
AdC e PPS per il Tessin
Il cusseglier naziunal dal Center e president da l'uniun d'artisanadi e mastergn Fabio Regazzi (Allianza dal Center) va da nov per il Tessin en il Cussegl dals chantuns. Il sulet cusseglier dals chantuns tessinais d'enfin ussa, Marco Chiesa (PPS) è vegnì confermà en il segund scrutini.
PPS perda sez a Turitg
La cussegliera naziunala da la PVL, Tiana Angelina Moser, cuntanscha il sigl en il Cussegl dals chantuns. La dunna da 44 onns lascha en il segund scrutini cleramain davos ella il cusseglier naziunal da la PPS, Gregor Rutz. En il chantun Turitg perda il champ burgais uschia ses sez.
Il resultats dals segunds scrutinis dals 12 da november:
- Friburg: Isabelle Chassot (en uffizi, AdC) e Johanna Gapany (en uffizi, PLD)
- Genevra: Mauro Poggia (nov, MCG), Carlo Sommaruga (en uffizi, PS)
- Vallais: Beat Rieder (en uffizi, AdC) e Marianne Maret (en uffizi, AdC)
- Vad: Pascal Broulis (nov, PLD)
Lisa Mazzone betg reelegida a Genevra
La cussegliera dals chantuns en uffizi Lisa Mazzone dals Verds n'è betg vegnida reelegida a Genevra. Elegì nov è vegnì Mauro Poggia dal Mouvement citoyens genevois, ina partida locala da dretga, en il Cussegl dals chantuns. A Carlo Sommaragua da la PS è gartegiada la reelecziun, el ha fatg var 1'100 dapli vuschs che Mazzone.
Verds perdan sez vadais
Pascal Broulis da la PLD va nov per il chantun Vad en il Cussegl dals chantuns. En il segund scrutini batta el Raphaël Mahaim dals Verds. Cun quai perdan ils Verds in sez en il Cussegl dals chantuns.
Chassot e Gapany reelegidas a Friburg
Isabelle Chassot (AdC) e Johanna Gapany (PLD) èn vegnidas reelegidas a Fribourg. Entant ch'il resultat per Chassot è stà fitg cler, ha Gapany battì la candidata da la PS Alizée Rey per be 914 vuschs.
Vallais resta en ils mauns da l'AdC
En il Vallais èn Beat Rieder e Marianne Maret, omadus da l'AdC, vegnids reelegids. Il candidat la PLD Philippe Nantermod hat fatg passa 20'000 vuschs damain che Maret.
