Siglir tar il cuntegn

Header

cuntegn

Tema 1: Ovras socialas Il passà declera la situaziun cumplexa dad oz

Ils ins survegnan ed ils auters pajan – sin quest sistem sa basa l'Assicuranza per vegls e survivents. L'AVS ed insumma las ovras socialas cun las trais pitgas è quest'emna en il focus dad RTR en vista a las elecziuns naziunalas.

«Ina democrazia na funcziuna betg senza AVS», di l'istoricher da l'universitad da Turitg ch'è spezialisà sin segirezza sociala Matthieu Leimgruber. L'idea da l'AVS era gia avant la segunda guerra mundiala sin maisa. Dentant pir suenter, en in temp d'euforia e da midament, ha l'idea chattà tegn.

L'AVS ha adina gì ina via crappusa. E quella via na vegn mai ad ir a fin cun quai che l'AVS è adina en moviment.
Autur: Matthieu LeimgruberIstoricher da l'universitad da Turitg

Ils liberaldemocrats en il Cussegl federal han dà schlantsch a l'idea. Tranter auter era per evitar ina segunda chauma generala. Suenter lungas debattas èn vegnidas pajadas ora dal 1948 las emprimas rentas. Quellas èn dentant vegnidas tegnidas pitschnas per ch'ellas na concurrenzeschian betg las cassas da pensiun.

L'AVS sto vegnir refurmada

L'AVS sto vegnir refurmada il pli svelt pussaivel. Da quel avis èn tut las partidas. Per l'ina vegn la populaziun adina pli veglia – quai dovra dapli daners per pajar ora rentas. Per l'autra datti pli pauca glieud giuvna che paja daners en l'AVS.

Il minister da sanadad, Alain Berset, ha dacurt preschentà sia refurma, suenter ch'ina emprima ha fatg naufragi a l'urna. La proposta ch'è uss vegnida sin maisa è però dispitaivla. La sanestra è cunter l'auzament da la vegliadetgna da pensiun da las dunnas ch'è previs. Ed als burgais mancan schliaziuns per ils problems structurals da l'AVS.

Il project da RTR «Ti ed jau faschain politica»

Il project da RTR «Ti ed jau faschain politica»

Persunas sco ti ed jau envidan candidatas e candidats per il Cussegl naziunal ad ina baterlada. Enturn maisa raquintan els dad ina sfida che fatschenta els en lur mintgadi. Quels 5 inscunters emetta RTR durant 5 mesemnas:

  • 04-09 Ovras socialas tar Ruodi Duschletta, Sent
  • 11-09 Sanadad tar Sandra ed Andri Baltermia, Salouf
  • 18-09 Economia tar Flurina e Simon Kaufmann-Henkel, Cuira
  • 25-09 Clima tar ina classa da la scola media, Glion
  • 02-10 Diaspora tar Peter Vesti e Petra Camathias, Turitg

Tar mintga tema dain era in sguard en l'istorgia, preschentain cifras e fatgs e numnain las sfidas actualas.

Las elecziuns naziunalas èn ils 20 d'october 2019.

RR actualitad 12:00