Tenor indicaziuns da l'Uffizi federal da sanadad sajan vegnidas dadas dals 8 enfi ils 14 da november en tut prest 167'000 squittas. Quai correspunda circa a la candenza da mez october. Dapi lura era il tempo da vaccinar anc ina giada sa reducì fermamain.
Grischun cun bunamain 1'000 novas vaccinaziuns
En il Grischun han 956 persunas laschà dar l'emna passada la squitta. L'uffizi da sanadad sco er il stab directiv chantun èn cuntents cun quest resultat, quai ha il chantun communitgà. Actualmain èn 68% da las Grischunas e dals Grischuns almain vaccinads ina giada.
Dapi l'emna passada èsi er pussaivel da s'annunziar per la vaccinaziun da booster en il Grischun, tenor indicaziun dal chantun sajan 4'300 persunas s'annunziadas per quel.
Da positiv enfin dischillusiunà en il rest da la Svizra
L'Appenzell Dadens fa ina bilantscha positiva da l'emna da vaccinar, là hajan 76 persunas dà la squitta, quai ch'è trais giadas uschè bler sco l'emna avant. En l'Appenzell Dadora hajan 415 dà l'emprima squitta, quai èn tuttina bleras sco durant in entir mais. Er bilantscha positiva fa il chantun Soloturn cun 1'152 primas vaccinaziuns, quai ch'èn dus terzs dapli che l'emna avant l'emna da vaccinar.
Lucerna persuenter fa bilantscha mediocra, els n'hajan betg cuntanschì la finamira da 5'000 novas vaccinaziuns. En tut hajan be 2'302 dà la squittà. Malgrà che il tempo da vaccinar è er s'augmentà per il dubel en il chantun Basilea-Citad, èn ils responsabels trumpads. Cun 37% n'hajan ins cuntanschì sutproporzionalmain persunas giuvnas.
En tut han ins vaccinà dapi l'entschatta da la campagna passa 11,3 milliuns dosas. Prest 5,7 milliuns persunas èn vaccinadas cumplainamain, quai correspunda a radund 64,9% da la populaziun.
Ord l'archiv
En il rom da l'emna naziunala da vaccinar hai dà a Cuira in pop-up da laschar dar la squitta.
