La societad aviatica ha lavurà l’emprim mez onn da l’onn current in da ses pli ferms resultats da sia istorgia. Il gudogn è cleramain pli aut, cumpareglià cun la medema perioda dal 2019. Uschia sa preschenta la Swiss sa revegnida da la crisa da corona.
La svieuta da la Swiss è cun 2,5 milliardas francs praticamain tuttina auta sco l’emprim mez onn dal 2019, pia avant la crisa da corona. Il gudogn è dentant per var 40% pli aut ch’avant quatter onns – quel è creschì sin 338,3 milliuns francs.
Bunas vistas per l'entir onn
Il schef da finanzas Markus Binkert ha tenor la communicaziun da la Swiss plaschair dal resultat. «Sco l'entira branscha avain era nus profità, che la dumonda da la glieud per viagiar cun aviun è vinavant stada pli auta che la spierta», vegn el cità en la communicaziun.
Questa constellaziuna dal martgà haja procurà, che pli paucs tickets per pretschs bass sajan stads a disposiziun. En consequenza haja l'interpresa pudì nudar entradas en media creschentas. Plinavant haja la Swiss profità da la restructuraziun fatg l'onn 2021, quella haja gidà da superar bain ils custs pli auts per exempel per l'energia.
Ils responsabels da la Swiss spetgan tenor la communicaziun, ch'il trend or dal segund quartal cuntinueschia. Uschia po l'interpresa era spetgar per l'entir onn da fatschenta in da ses pli ferms resultats insumma.
