L'onn 2020 è stà in onn cun gronda intschertezza cun il cumenzament da la pandemia da corona. Sin las cifras da suicidi n'ha quai dentant betg gì in'influenza marcanta. Il dumber da suicidis en Svizra cuntinuescha da sa sminuir.
Dumber va enavos a lunga vista
972 persunas han prendì la vita l'onn 2020 tenor l'Uffizi federal da statistica. Sulettamain en la gruppa da dunnas giuvnas sut 25 onns vesan ins in lev augment. L'onn 2019 èn quai stads 25 cas cumpareglià cun 33 cas il 2020. Vinavant è la gronda maioritad, numnadamain dus terzs da las persunas che fan suicidi, umens.
Per l'emprima giada dapi l'onn 1964 è la cifra sut 1'000 cas. Suenter radund 1'600 cas en la perioda dal 1980 al 1985 è il dumber da suicidis adina sa reducì. La regiun che mussa ils pli paucs cas da suicidis è il Tessin. La pli auta rata da suicidis è sa mussada durant ils onns 2015-2020 en la regiun Turitg.
