La Confederaziun sustegna emprendistas ed emprendists ch'èn periclitads da perder la plazza perquai che lur firma ha da cumbatter cun la crisa da corona. Tenor il minister d'economia Guy Parmelin ha il Cussegl federal decretà ina nova regulaziun per segirar als emprendists lur plazza da lavur.
Firmas che fan lavur curta na dastgian normalmain betg engaschar ulteriur persunal. Quai ha ditg Parmelin envers las medias da Tamedia. La Confederaziun haja però decis ina excepziun per persunas ch'han gist terminà l'emprendissadi. Ils emprendists possian restar per in onn en lur manaschi.