Siglir tar il cuntegn

Header

Dus emprendists da mecanist.
Legenda: Ils examens pratics per serrar giu ils emprendissadis han lieu. Las recumandaziuns da la Confederaziun ston dentant vegnir resguardadas. Keystone
cuntegn

Examens finals emprendissadi Examens pratics han lieu – examens a scrit betg

Ils emprendists svizzers pon serrar giu lur emprendissadi questa stad, malgrà la crisa da corona. Ils examens finals d’emprendissadi han lieu – ma be ils examens pratics. Dals examens da scola vegni percunter desistì. Enstagl da quels quintan las notas d’experientscha en ils roms teoretics. Tar la furmaziun generala vegn er resguardà la lavur da profundaziun.

Per las notas d'experientscha vegnan resguardadas las notas d'attestat da l'entira durada da l'emprendissadi fin tar l'emprim semester da l'onn da scola 2019/20. Per persunas che stattan la segunda giada davant ils examens finals na vegnan las notas da pli baud betg resguardadas. I vegn persuenter fatg in discurs da qualificaziun cun questas persunas.

Ina varianta per l'entira Svizra

Ils examens pratics vegnan preparads per mintga scolaziun professiunala – per part cun differenzas tenor branscha, direcziun u focus. I duai vegnir tschernì ina varianta ch'ins po far en tut ils chantuns ed en tut ils lieus d'examen. Fin ils 17 d'avrigl pon las organisaziuns da branscha responsablas inoltrar lur proposta per manar tras ils examens.

Sin quai sajan ils acturs da la furmaziun professiunala vegnids perina – sco la Confederaziun ha communitgà. Tar ils examens finals d’emprendissadi stoppian las recumandaziuns da la Confederaziun vegnir resguardadas. Questa stad serran var 75’000 emprendists giu lur emprendissadi en l’entira Svizra.

Artitgels legids il pli savens

Ir a sanester Ir a dretg