In'activista per il clima ch'era vegnida declerada nunculpanta è uss tuttina vegnida sentenziada. La dretgira suprema turitgaisa ha cupitgà ina sentenzia da la dretgira districtuala. Il 2020 aveva la dunna bloccà uras a la lunga, ensemen cun autras persunas il traffic da tram e bus.
Damai ch'il derschader da lezza giada aveva declerà da princip nunculpant pliras activistas ed activists, haveva la procura publica crititgà ch'el saja partischant e tratg vinavant il cas. La sentenzia n'è anc betg legalmain valaivla.
Toleranza cun cunfins
Las autoritads sajan avisadas da mussar ina tscherta toleranza, ha il derschader ditg en l’argumentaziun. Tar ina tala bloccada sco sin la punt dal quai a Turitg il zercladur 2020, saja la mesira dentant surpassada. Var 250 demonstrants e demonstrantas èn sa participadas la bloccada da la punt quai di. La finamira da l’acziun è stada l’attenziun mediala.
Il temp d’emprova per il chasti da daners munta a dus onns. Vul dir: Sche l'activista sa tegna durant quest temp vi da las reglas, na sto ella betg pajar il chasti. Ella sto però surpigliar ils custs da dretgira da plirs millis francs. La sentenzia n’è anc betg legalmain valaivla, ella po anc vegnir tratga vinavant al Tribunal federal.
