Il Cussegl federal refusa ina iniziativa dal pievel che vul scumandar a persunas privatas d'arder fieu artifizial che fa canera. Ed el na vul era nagina cuntraproposta en chaussa. Basa legala per restrenscher fieus artifizials dettia gia en chantuns e vischnancas, ha el scrit mesemna.
L'iniziativa dal pievel pretenda che fieus artifizials che fan canera, sco per exempel rachetas, na dastgian betg pli vegnir vendids a persunas privatas. Persunas privatas na duessan era betg dastgar duvrar quels.
Restar lubids duain products pirotecnics che van en l’aria senza canera. Era tar occurrenzas surregiunalas duai restar lubì da far fieu artifizial – cun l’approvaziun dal chantun.
Il Cussegl federal saja conscient, ch’in fieu artifizial che fa canera vegnia resentì d’ina part da la populaziun sco disturbi e possia chaschunar reacziuns tar ils animals. Blers chantuns e bleras vischnancas hajan gia fatg diever da lur dretg da restrenscher u scumandar d'arder fieus artifizials.
