Siglir tar il cuntegn

Header

cuntegn

Energia A la bursa è l'energia fitg bunmartgada

Per chasadas privatas è l'energia chara. A la bursa è l'energia dentant bunmartgada. Ils pretschs sajan uschè bass sco anc mai dapi l'entschatta da la guerra en l’Ucraina. Quai ha ditg Andreas Möckel, expert tar la cumissiun per l’electricitad Elcom, en l’intervista cun la «Sonntagszeitung». Cumpareglià cun la stad saja il pretsch 40% pli bass.

Er ina mancanza d'energia na saja betg probabla. Ils lais da fermada sajan emplenids, en la Germania dettia bler gas en ils deposits, e las ovras atomaras en la Frantscha funcziunian tuts, auter che l'onn passà.

Perquai ch'ils concerns d'energia cumpran en l'energia ordavant, na porta quai nagut a consumentas e consuments. Il 2024 ston els pajar en media 20% dapli per il current. Gia il 2023 hai dà in augment.

Gudogns dals concerns

En la «Sonntagszeitung» vegn discutà ils gudogns da milliardas dals concerns d'energia. L'Axpo haja fatg quest atun in gudogn da milliardas. Ed era las ovras d'electricitad bernaisas BKW hajan fatg in gudogn da record il 2024.

La BKW e l’Axpo sincereschian da betg far quai sin donn e custs da las chasadas. Il CEO da la BKW di en la «Sonntagszeitung» ch'els fetschian il gudogn en autras spartas, e betg tar las chasadas privatas. Era l'Axpo di ch'ins fetschia il gudogn cun las fatschentas cun l'exteriur.

Ed ils chantuns che possedan ils concerns hajan pauc interess da midar la situaziun, cunquai ch’ils gudogns dal concerns d’energia gidian els d’embellir lur budgets.

Tenor lescha na dastgan ovras d'electricitad en Svizra betg far gudogn cun energia per chasadas privatas, scriva la «Sonntagszeitung».

Or da l'archiv:

video
Ils pretschs d'energia èn creschids per il traidubel per da la mazlaria Venzin
Or da Telesguard dals 13.09.2022.
laschar ir. Durada: 3 minutas 15 Secundas.

RTR novitads

Artitgels legids il pli savens