In resultat central da l'enquista da sanadad è l'augment dal squitsch psichic. La cumpart da persunas pertutgadas da squitsch mesaun ubain ferm è creschì da 15% sin 18%. Surtut tar persunas giuvnas sa mussa quai: 22% da las persunas sa sentan sut squitsch psichic.
L'enquista mussa dentant era: 80% da la populaziun sa senta per gronda part «quiet, equilibrà e ruassaivel» – 83% sa senta cuntent.
Dapli persunas cun surpais
43% da la populaziun sur 15 onns ha surpais u ha adipositas. Surtut umens sajan pertutgads da memia aut pais. Il sguard sin ils davos decennis mussa dentant: Suenter in augment ferm tranter 1992 e 2012 na crescha la cumpart da persunas cun surpais betg pli uschè spert.
La sensibilisaziun per nutriment sanadaivel crescha dentant er. 71% da la populaziun fa attenziun tar quai ch'i mangian. Il consum da charn è sa sbassà: mo pli 12% da la populaziun mangia mintga di charn.
Dapli alcohol, pli pauc tubac
La populaziun baiva da principi pli darar alcohol. Per la paja vegn lura bavì dapli. La cumpart da persunas che sa baiva sturn ina giada al mais è creschì sin 11% da las dunnas e 19% dals umens. Persunas giuvnas sa baivan pli savens sturn che persunas pli veglias.
Nua ch'i dat in regress, è il consum da tubac. In quart da la populaziun consumescha insumma tubac – avant 30 onns eran quai anc in terz da la glieud. Tar las persunas che fiman sa chattan surtut persunas senza ina scolaziun pli auta (universitad, scol'auta etc.). Tar persunas giuvnas sa derasan cigarettas electricas ubain snus.
Or da l'archiv: