Siglir tar il cuntegn

Header

video
Virgine Masserey: «La tschintgavla unda ha cuntschì ses pli aut nivel»
Or da News-Clip dals 08.02.2022.
laschar ir. Durada: 7 Secundas.
cuntegn

Experts da la Confederaziun «Tschintgavla unda ha cuntanschì il zenit»

Il punct culminant da l'unda dad omicron è tenor la taskforce scientifica da la Confederaziun surmuntà. La cifra da reproducziun ch'inditgescha quantas persunas ch'ina persuna ch'è positiva, infectescha è en la media emnila tar 0,92. Actualmain stagneschia il dumber d'infecziuns sin aut nivel. Per la tgira saja la situaziun anc adina pretensiusa. Virgine Masserey da l'Uffizi federal da sanadad ha en quest context er appellà da resguardar vinavant las mesiras d'igiena. La stagnaziun pudessia anc cuzzar in temp.

En il medem mument dat la taskforce era d'entellir, quant gigantic che las dimensiuns da l'unda dad omicron èn. Passa 700'000 persunas sajan vegnidas testadas positiv las davosas trais emnas. Cun resguardar il dumber zuppà possia omicron avair infectà in quart fin in terz da la populaziun.

Dapli attenziun per Covid a lunga durada

Tenor ils experts da la Confederaziun na vegnian pazeintas e pazients cun sintoms da Long Covid betg anc propi pigliads serius. Ma bun mintga tschintgavla persuna en Svizra che saja stada infectada cun il coronavirus, possia patir da sintoms a lunga durada – sco p. ex. stancladad, mal il chau u las giugadiras ubain avair fadia da respirar. Emprima persuna da contact per pazientas e pazients saja savens il medi u la media da chasa. Quels tramettian lura vinavant ils pazients e pazientas a medis u medias dal fatg.

L'Uffizi federal da sanadad stettia dapi l'entschatta en contact cun scienziads, ospitals ed universitads en connex cun Long Covid. I saja impurtant da render conscient a quella malsogna e da vegnir a savair dapli dad ella. Per quest intent hajan ins stgaffi duas gruppas da lavur ed ina plattafurma da barat per pazientas e medis.

Armada gida anc en tschintg chantuns

Actualmain gidia l'armada anc en ils chantuns da Berna, da Friburg, da Genevra, Giura e Vallais. Quest'emna sajan anc 350 schuldads en acziun. Entaifer l'armada dettia per il mument 357 cas positivs da corona. Perquai vegnia er la scola da recruts lantschada pass per pass e mascrinas da FFP2 sajan obligatoricas, uschia Flavien Schaller dal commando operaziuns da l'armada.

video
Flavien Schaller: «L'armada gida anc en tschintg chantuns»
Or da News-Clip dals 08.02.2022.
laschar ir. Durada: 10 Secundas.

RTR novitads 15:00

Artitgels legids il pli savens