La Chadaina da Fortuna appellescha a la solidaritad per las persunas en il Libanon. La populaziun ha tutgà ina catastrofa nunditga. Dar pon ins a partir d'immediat via las suandantas pussaivladads:
Il donn chaschunà entras l'explosiun a Beiru è talmain grond, che la bilantscha è be provisorica. Passa 130 persunas han pers lur vita e 5'000 èn blessads. Il port da la citad è vegnì destruì cumplettamain e la citad sezza è devastada. Suenter la guerra burgaisa dals onns 70 ed 80, guarda la citad ussa puspè or sco durant la guerra. Per il pajais èsi ina catastrofa memia bler, suenter ch'el è crudà il 2019 en ina crisa economica. Ed er la crisa da corona ha gia chaschunà che blers ospitals èn surdumandads.
Stan intermediar da las donaziuns
La Chadaina da fortuna ha gia rimnà 4,2 milliuns francs (stan dals 20 d'avust) per gidar il Libanon suenter la detunaziun enorma cun gronds donns e blers morts. Sco quai che l'organisaziun caritativa communitgescha, na tanschia quai dentant betg per finanziar ils projects d'agid en la citad destruida. La Chadaina da fortuna appellescha perquai ad ulteriuras donaziuns.
5 ovras d'agid en il lieu
La Caritas, la Crusch cotschna svizra, HEKS, Medair e Terre des hommes èn en acziun a Beirut per evaluar tge che la populaziun dovra ed er per dar emprim agid. Grazia a lur bunas enconuschientschas dal pajais saja la collavuraziun cun las autoritad localas e las organisaziuns umanas buna e l'agid vegn svelt al lieu, scriva la Chadaina da Fortuna.
Donaziuns per quels senza suttetg
Il basegn per agid saja grond, scriva la chadaina. I na giaja betg be per la tschertga da survivents en las ruinas e lur provediment medicinal. Impurtant saja er da tgirar las radund 300'000 persunas che n'han suenter l'explosiun nagin dachasa pli. Intgins han pudì vegnir a susta tar lur parents, blers auters èn en scolas ed auters bajetgs publics nua che tut sto anc vegnir endrizzà per tantas persunas. Quels dovran urgentamain aua, nutriment e chaussas essenzialas sco cuvertas, products d'igiena, utensils per cuschinar, euv.
