La Svizra ha exportà l'onn passà material da guerra per 955 milliuns francs – uschè bler sco anc mai dapi che las datas vegnan ramassadas. Quai èn 210 milliuns francs u 29% dapli che l'onn passà, scriva il Secretariat da stadi per l'economia (Seco). Exportads èn vegnids surtut vehichels armads (26,5%), muniziun e parts da muniziun (24,8%), armas da differents calibers (24,8%) e sistems da direcziun dal tir.
Il pli bler material da guerra ha la Svizra exportà en il Qatar, in grond affar è stà il sistem da defensiun or da l'aria. Il Danemarc ha cumprà surtut chars armads da la Svizra. La Germania è sin plaz trais dals cumpraders da material da guerra ed ha surtut cumprà muniziun.
Il parlament discuta en il mument l'export d'armas Svizras en l'Ucraina tras auters pajais. Fin ussa n'ha la Svizra betg exportà u dà la lubientscha da dar vinavant armas ad auters pajais.
