Da las muntognas vallesanas enfin las alps grischunas èn ils resultats stads positivs. Bunas novas pia per las producentas d'energia solara ch'èn cun grond squitsch vi da planisar e bainprest bajegiar las grondas ovras solaras alpinas: Lur resultats dals indrez da test èn tuttafatg positivs, di il Tagesanzeiger.
L'emprima ovra che vegn construida en il rom dal Express solar en Svizra è quella da Sedrun Solar da l’Energia Alpina. L'ovra da test haja producì il davos onn 4% dapli energia che spitgà, di Ciril Deplazes, il mainafatschenta da l’Energia Alpina. Els hajan tschaffen da quels resultats manegia el. Bun saja er che l'ovra da test haja bunamain producì la mesadad da l’energia tranter l’october ed il mars, pia durant ils mais che la Svizra dovra dapli energia. Sumeglianta saja la situaziun tar la firma Alpiq. Lezza ha trais ovras da test en il Vallais: ina tar il Simplon e tschellas duas el Vallais Sut. Ils tests hajan surpassà las finamiras, di Guido Lichtensteiger, il pledader da medias da la firma Alpiq.
Cun quels resultat positivs sappian ins lavurar vinavant, manegia era Guidio Lichtensteiger da l’Alpiq. Ins possia uss optimar ils indrez. Quel n'haja ins sapientivamain betg construì en ils megliers lieus per esser suenter da la vart segira. Er tar Ciril Deplazes ed Sedrun Solar giaja il svilup vinavant. Quest onn monteschian els 20 maisas e pass per pass emprendian ins durant il process da construir l’ovra solara.
Metter la producziun en relaziun cun ils gronds custs da construcziun
Andreas Beer è expert d'energia, cussegliader per distributurs d'energia sco era docent tar diversas scolas autas davart quest tema. El manegia ch'ins stoppia metter las cefras positivas da las producentas d'energia en relaziun. I saja legraivel ch’ins haja producì dapli che quintà, ma quai saja entaifer las calculaziuns ch'ins stoppia risguardar. Las mesiraziuns d'in onn mussian dentant era che la producziun saja cunzunt l’enviern pli auta che spetgada, tge che saja legraivel.
Las producentas d'energia solara survegnan subvenziuns da la Confederaziun via l’Express solar. Sche la producziun d'energia saja meglra haja la Confederaziunda pajà pli pauc. En vista da la rentabilitad gidia quai dentant pli pauc, perquai ch'ils riscs ed ils custs restian fitg gronds tar la construcziun d'ovras solaras alpinas. Andreas Beer metta la producziun d'energia ed ils cust da construcziun en relaziun: La producziun saja sulettamain in factur e quel possian ins mesirar bain. Pli grev da calcular sajan ils cust da las ovras solaras, perquai ch’ins na haja enfin uss anc mai bajegià da quellas ovras. Ils custs da bajegiar procurian pia per dapli malsegirtad che la producziun d’energia.
