Far frunt a la violenza - Plan d'acziun da segirezza per schurnalistas e schurnalists
L'Uffizi federal per la communicaziun BAKOM lantscha in nov plan d'acziun per la protecziun per collavuraturas e collavuraturs da medias. La raschun saja ch'i dettia adina dapli smanatschas e violenza cunter schurnalistas e schurnalists, sco il BAKOM communitgescha.
Legenda:
Las medias svizras sajan confruntadas pli e pli fitg cun attatgas sin via ed en il spazi digital. Per far frunt a quai è vegnì lantschà in plan d’acziun.
Keystone
Il plan d'acziun saja la consequenza d'ina resoluziun dal cussegl d'Europa. El cumpiglia 9 mesiras sin ils champs sensibilisaziun, prevenziun, protecziun e sustegn tar smanatschas e violenza verbala sco er corporala. Concret vai per exempel per sensibilisar ils giuvenils sin la valur da las medias u er per ina maisa radunda da medias e polizia.
Las nov mesiras
Avrir la boxSerrar la box
Sensibilisar e prevegnir
Mesira 1: Sensibilisar ils giuvenils per la valur da las medias
Mesira 2: Maisa radunda cun collavuraturs da las medias e cun la polizia
Mesira 3: Retschertga davart la situaziun da segirezza da las collavuraturas e dals collavuraturs da las medias
Mesira 4: Dialog da branscha tar la dumonda d’unificaziun dals certificats da pressa
Protecziun e sustegn en cas da smanatschas e da violenza
Mesira 5: Pagina d’internet da la branscha davart il proceder en cas da smanatschas e da violenza
Mesira 6: Agid da las represchentanzas svizras a l’exteriur
Mesira 7: Regulaziun da plattafurmas da communicaziun
Cundiziuns da basa legalas
Mesira 8: Analisa dals plants giudizials abusivs en Svizra
Mesira 9: Engaschament sin plaun europeic cunter plants giudizials abusivs
Vitiers vegnan plants per evitar rapports che na plaschian betg. Malgrà che las leschas porschan ina tscherta protecziun stoppian ins esser pli conscient da la muntada da las medias independentas, di il minister da medias Albert Rösti.
