Ils Svizzers e las Svizras han fatg levet damain donaziuns da sang l'onn passà, numnadamain 0,6% pli paucas, quai scriva la Crusch Cotschna Svizra, ch'è responsabla per il provediment cun products da sang. Ils ospitals han dentant era duvrà pli pauc sang, perquai ch'i hajan duvrà il sang pli effizient. En general è il provediment cun products da sang dentant restà stabil l'onn 2023 malgrà tschertas fluctuaziuns.
Ils posts da donaziuns da sang han auzà las acziuns mobilas per 14% ils davos tschintg onns. Tuttina èn las donaziuns da sang sa reducidas per 11% durant quest temp. Quai mussa ch'i saja daventà pli difficil da survegnir donaziuns da sang, tenor la Crusch Cotschna. Tar acziuns organisadas da firmas e scolas autas fan per exempel pli paucas persunas donaziuns da sang. Tenor la SRK è in dals motivs l'opziun da far home-office.
Dapli transplantaziun da cellas-tschep
In record hai dà tar las transplantaziuns da cellas-tschep dal sang (per tudestg: Blutstammzellen). En tut eran quai 328 transplantaziuns, ha la Crusch Cotschna communitgà. La cifra è pia creschida per 14,3% dapi l'onn passà.
