Per l'emprima giada en sia istorgia da 130 onns ha lieu la Festa federala da lutga e da gieus alpesters ESAF en il chantun Glaruna. 350'000 persunas vegnan spetgadas dals 29 fin ils 31 d'avust – en in chantun cun bunamain 10 giadas pli paucas abitantas ed abitants.
15 onns lavur stattan davostiers. Entant èn ils set rintgs da resgim pronts per ils 274 lutgaders. Il comité d'organisaziun è vegnì engrondì per bunamain 200 persunas, millis persunas gidan voluntarmain. 120'000 uras da lavur ha l'organisaziun da l'ESAF inditgà sin sia pagina d'internet.
La glista da las incumbensas è infinita. 1380 paginas cumpiglia l'entira planisaziun – da la protecziun dal terren fin a las 696 tualettas.
Perruns pli lungs e 450'000 liongias
Er quai che pertutga la gastronomia quintan ils responsabels cun cifras immensas: 270'000 liters biera, 24'000 liters vin, 5'400 liters vinars, 450'000 liongias, quatter tonnas paun nair e 125'000 cafés.
Per mangiar e baiver tut quai ston las visitadras ed ils visitaders l'emprim arrivar a Mollis. Per quai vegnan mess a disposiziun trens pli lungs, ed er ils perruns a la staziun vischina da Näfels-Mollis èn vegnids prolungads aposta per la festa da lutga.
-
Bild 1 von 3. Las preparativas en il Glarnerland èn instradadas cun tutta forza. Dals 29 fin ils 31 d'avust sa duelleschan qua ils megliers lutgaders da la Svizra. Bildquelle: Keystone.
-
Bild 2 von 3. Per installar l'arena gigantica sustegnan er persunas da l'armada e da la protecziun civila. Bildquelle: Keystone.
-
Bild 3 von 3. La planisaziun per la fin d'emna da festa han cumenzà avant 15 onns. Bildquelle: Keystone.
Intgins giasts pernotteschan sin in da las 2'000 plazzas da campers. Quels sa chattan da l'autra vart dal flum da la zona da festa da 70 hectaras. Per quels ha l'armada construì trais punts provisoricas per peduns sur la Linth. L'armada e la protecziun civila han prestà en tut bunamain 9'000 dis da lavur.
182 tonnas laina – en furma da taur
Monument caracteristic inuffizial da l'ESAF è il taur da lain Max – 20 meters aut, 30 meters lung e 182 tonnas grev. Passa 500 emprendistas ed emprendists da 220 interpresas da construcziun en lain han creà la sculptura da 1'200 meters cubic lain svizzer. Max pudess uschia esser il taur da lain il pli grond dal mund, supponan ins en Glaruna.
-
Bild 1 von 5. Monument caracteristic inuffizial: Muni Max che vesa sur quasi l'entir areal. En la construcziun da lain suten ... Bildquelle: Keystone.
-
Bild 2 von 5. ... sa chatta il tempel da premis. L'interess per quel è grond. Bildquelle: Keystone.
-
Bild 3 von 5. Ina motoretta, in letg ... Bildquelle: Keystone.
-
Bild 4 von 5. ... sculpturas, commodas, in letg da pops – l'xposiziun è multifara. Bildquelle: Keystone.
-
Bild 5 von 5. Ils regals èn sponsurads dad uschenumnadas partenarias e partenaris da premis. Bildquelle: Keystone.
En furma dad in U sa chatta il tempel da premis. En quel èn plazzads ils premis d'ina valur totala dad 1 milliun francs per ils lutgaders ed ils stuschaders da crappa. Per il nov retg da la lutga datti mintgamai in taur veritabel. A Mollis è quai il Zibu da quatter onns. Tut ils auters dastgan tscherner lur premi.
Ultra dals premis da vivonda sco bovs u chavallas pon vegnir tschernids er nundumbraivels premis materials sco stgellas u commodas.
Al sid dal tempel da premis sa chattan 40 stans d'alimentaziun e 10 tendas da festa. En quel sa preschentan tut en tut 275 artistas ed artists. L'access è avert e gratuit – auter che tar las 56'500 plazzas en l'arena. Tgi che ha là vulì ina plazza en la categoria la pli chara ha stuì pajar 290 francs – 25 francs dapli che tar l'ultima festa a Pratteln BL.
22 milliuns visitas sin la pagina d'internet l'avust
Mo l'avust saja la pagina d'internet da l'ESAF vegnida visitada 22 milliuns giadas, han scrit ils responsabels. 270 schurnalistas e schurnalists èn accreditads en l'arena. Passa 3'000 artitgels davart la festa èn gia cumparids en las gasettas. Cura ch'il retg da la lutga vegn enconuschent suenter il percurs final la dumengia a las 16:45 vegnan quai ad esser intgins millis artitgels dapli.