El è imposant il taur da lain Max. 20 meters aut, 30 meters lung, in pais da 180 tonnas e totalmain passa 41'000 tocs singuls. Il manader da construcziun Paul Engler da Saas raquinta plain plaschair da las sfidas e da la idea dal «Muni Max». Il project «HolzvisionMax» lantschà da la branscha da lain vuless mussar ils avantatgs e la fermezza dal material lain. Uschia saja naschida l'idea da crear il taur da lain e da mussar che la branscha sa crear insatge unic. La festa federala da lutga la fin avust a Mollis saja il dretg lieu e la dretga tribuna per sa preschentar, uschia ha ditg Engler.
Il muni è purtader da reclama
Tut las passa 160 firmas ed instituziuns da scolaziun hajan enfin ussa fatg tut per esser pront la fin d'avust a chaschun da la Festa federala da lutga a Mollis. «Dal terrar e resgiar las plantas, elavurar la laina, planisar e metter la finala en pais Max èn tuts cun plaschair vidlonder», uschia ha ditg Engler. Il mument sajan las sfidas anc pitschnas e survesaivlas, pli manaivel che la data da construcziun vegnia, pli gronda daventia la tensiun. L'entschatta d'avust saja il termin da ventschigliun. Ina sfida vegnia franc ad esser il pauc temp ch'ins haja a disposiziun per tschentar ensemen ed uschia dar furma e vita a Max.