Ina gronda maioritad da la populaziun è da l'avis che las mesiras rigurusas sajan adattadas a la situaziun. Ina maioritad che preferiss reglas da sortir pli strictas na datti il mument betg: 44% da las persunas dumandadas èn da l'avis che las mesiras dal Cussegl federal giajan memia pauc lunsch u bler memia pauc lunsch.
Cunzunt persunas pli giuvnas giavischassan dapli restricziuns da sa mover. Persunas pli veglias èn percunter pli cuntentas cun l'agir dal Cussegl federal.
Memia baud u memia tard? – Nagin consens tar populaziun
Sin la dumonda sch'il Cussegl federal haja prendì en il dretg mument las dretgas mesiras van las opiniuns dapart:
Ch'il Cussegl federal haja reagì memia tard manegia cunzunt la populaziun da la Svizra taliana (68%) sco er persunas pli giuvnas. En la Svizra tudestga – ch'è anc pli pauc pertutgada da la pandemia – è la populaziun da l'avis ch'il tempo saja stà adattà a la situaziun (56%).
In sumegliant maletg sco enfin qua sa mussa er tar la fidanza en ils gremis politics: 63% da la populaziun haja «gronda» u «fitg gronda» fidanza en il Cussegl federal. Ils pli giuvens fidian pli pauc – ils pli vegls pli fitg.
Foss dal rösti cura ch'i va per fidanza
Marcantas èn las differenzas tranter la Svizra tudestga e la Svizra latina: Fertant che la fidanza munta en la Svizra tudestga a 71%, è quella quota en la Svizra franzosa tar 43%. En la Svizra taliana èn quai 46%.
Co rapportan las medias?
La finala ha la retschertga er intercurì co la lavur da las medias vegn recepida. En general vegn lur lavur valitada sco positiva ed ina maioritad (51%) è da l'opiniun che las medias rapportan cumplessiv. Percunter resentan 22% da la populaziun che las medias exagereschian cun ils rapports senza fin. Radund 25% èn da l'avis che las medias contribueschian a panica.
