Per tge vai? Fieus artifizials canerus duain vegnir scumandads en Svizra. Suenter il Cussegl naziunal ha uss er il Cussegl dals chantuns approvà novas disposiziuns davart l'import e l'utilisaziun da fieus artifizials. Perquai duai vegnir midada la lescha davart materials explosivs. L'impuls per questas midadas è l'iniziativa dal pievel «Per ina restricziun dals fieus artifizials (Iniziativa cunter ils fieus artifizials) ». Perquai che quella giauda – tenor retschertgas – tar la populaziun ina gronda retegnientscha, ha il parlament elavurà ina cuntraproposta indirecta.
Tge è nov? Fieus artifizials che servan exclusivamain a producir in sfratg cun canera duain vegnir scumandads. Plinavant vulan omadus cussegls che l'import da chandailas magicas, bumbas cun surpraisa ed auters fieus artifizials pitschens vegnia limità a 2.5 kilograms per di e persuna. Per importar fieus artifizials pli gronds e privlus dovri ina permissiun.
Tge resta? Tar l'obligaziun da mussar il document d'identitad na duai dar naginas mesiras pli rigurusas. In document d'identitad dovri er vinavant mo per utilisar objects pirotecnics ch'èn destinads ad intents industrials, tecnics u agriculs. Er in'obligaziun chantunala da dumandar ina permissiun per arder fieus artifizials, dals quals resulta in privel mesaun u grond, è giud maisa.
Tge products n'èn betg pertutgads? Ils fieus artifizials cun effects optics n'èn betg pertutgads da las mesiras engrevgiantas. Medemamain legal èsi d'arder fieus artifizials ch'èn in privel fitg pitschen e che chaschunan in nivel da canera che sto vegnir negligì. Il Cussegl federal vegn a reglar ils detagls en in'ordinaziun. Fieus artifizials appreziads sco vulcans, che vegnan per regla resentids sco pauc disturbants, duain pudair vegnir duvrads vinavant.
Tge capita cun ils fieus artifizials dal 1. d'avust? Fieus artifizials per la festa naziunala duain restar pussaivels er vinavant. Il parlament ha accentuà durant la debatta ch'ins veglia mantegnair ils usits festivs ch'èn ancrads en la populaziun. Ils chantuns e las vischnancas pon er vinavant decider autonomamain en chaussa. Concretamain pon els restrenscher temporalmain e localmain l'arsa da fieus artifizials a tschertas occurrenzas, als colliar cun cundiziuns supplementaras u scumandar dal tuttafatg.
Tge vala en cas da fieus artifizials en l'interiur? Suenter la catastrofa d'incendi a Crans-Montana ha la cumissiun cumpetenta dal Cussegl dals chantuns examinà in scumond da fieus artifizials en l'interiur ch'èn accessibels al public. Perquai ch'in tal scumond è entrà en vigur gia il 1. d'avrigl en tut ils chantuns, èn las regulaziuns dal dretg federal daventadas obsoletas.
Tge è anc planisà? Quai è anc avert. Sche las auturas ed ils auturs da l' iniziativa cunter fieus artifizials retiran lur dumonda, resta tar las midadas concludidas dal parlament. Sche l'iniziativa vegniss en votaziun e sche quella vegniss acceptada, stuess il parlament bain realisar restricziuns pli vastas per la vendita e per l'utilisaziun da fieus artifizials che fan canera.