La forsch da paja resta averta sin nivel fitg aut, scriva il sindicat Unia en ses studi annual davart las pajas. La relaziun tranter la pli auta e la pli bassa paja en in'interpresa è en media tar 1:137. Unia ha examinà ed analisà la situaziun da paja da 37 interpresas cotadas a la bursa.
La pli gronda differenza hai danovamain dà tar il concern farmazeutic Roche. La paja dal CEO Severin Schwan cun 14,6 milliuns francs stat en ina relaziun da 1:298 a la paja la pli bassa tar Roche. Ina persuna engaschada tar Roche cun la pli bassa paja stuess pia lavurar 298 onns per survegnir la paja da Schwan.
Sper Schwan han trais ulteriurs CEO gudagnà l'onn passà dapli che 10 milliuns francs: Sergio Ermotti da l'UBS (13,1 milliuns), Ulf Mark Schneider da Nestlé (10,7 milliuns) e Vasant Narasimhan da Novartis (10,4 milliuns).
Pajas sut 4'000 francs
Las pli bassas pajas en ils concerns examinads han in median da 3'939 francs. En la mesada da las interpresas analisadas è uschia la paja la pli bassa sut 4'000 francs. Questas pajas na tanschian strusch da viver, scriva Unia. Intginas interpresas hajan dà augments da paja a lur CEO's er sche las firmas hajan fatg perditas.
