La telelavur porscha libertad a collavuraturas e collavuraturs. Durant ils ultims dus onns han bleras firmas emprendì d’enconuscher ils avantatgs da la telelavur. Cun ina buna realisaziun, possian firmas daventar pli attractivas per il persunal ed era spargnar daners, per exempel sch'ins na dovra betg pli uschè bleras localitads da biro. Uschia declera Heike Bruch ch'è professura per persunal da cader a l'Universitad da Son Gagl.
Bun liom tranter direcziun e persunal
In bun contact cun collavuraturas e collavuraturs saja d'impurtanza per che quels na sa sentan betg persuls. Per che quai gartegia possian ins per exempel introducir ina uschenumnada «fasa da buddy». Quai è in temp nua ch'ils collavuraturs sa vesan fisicamain e discutan dal mintgadi da lavur e betg be da moda virtuala.
