Il Cussegl federal ha preschentà ils proxims pass per il svilup da l'infrastructura da traffic naziunala fin l'onn 2045. In'analisa independenta mussia tge projects che hajan prioritad fin l'onn 2045, scriva il Cussegl federal. Il cussegl è da l'opiniun che la populaziun e l'economia dependan d'ina infrastructura da traffic che funcziunescha. Ma i dettia gronds sfidas, sco per exempel custs supplementars en il sectur da viafier da circa 14 milliardas francs, sche la Confederaziun na prenda betg mesiras. Plinavant saja l'ultim svilup da l'infrastructura da vias vegnida refusada da la populaziun.
Rapport da l'ETH Turitg sco basa per mesiras futuras
Per incumbensa dal Departament federal per ambient, traffic, energia e communicaziun (UVEK) ha l'EHT Turitg fatg in'analisa independenta per identifitgar ils projects prioritars da traffic naziunal fin l'onn 2045 ed il proceder per il svilup da viafier, via e traffic d'aglomeraziun. Il rapport da l'ETH Turitg serva sco basa essenziala per las decisiuns futuras dal Cussegl federal. Sin basa da questa analisa decida il Cussegl federal ils proxims pass per il svilup da viafier e via, sco era per il program d'aglomeraziun.
- L'UVEK ha da preschentar al Cussegl federal fin la fin da schaner tge projects che duain vegnir introducids en ils proxims pass da svilup.
- Per l'infrastructura da viafier po l'uffizi per quai quintar cun dapli entradas. Per las vias ed il traffic d'aglomeraziun resta il finanzial sco fin uss.
- Ils pass da svilup per las vias naziunalas, viafier ed aglomeraziun vegnan ensemen en ina procedura da consultaziun per mussar che la planisaziun saja cumplessiva sur ils meds da traffic. Cunter las decisiuns po vegnir fatg separadamain in referendum.
- La procedura da consultaziun duai esser pronta la fin da zercladur 2026.
Grischun
Prioritad per ils onns 2025 fin 2045 dat il studi be ad in project en chantun Grischun. Quai è la cruschada Li Foppi per la Viafier retica tranter San Murezzan e Tirano.
Il sviament per Bivio giuditgeschan ils auturs dal studi era sco prioritar, ma betg uschia sco planisà. Per quest project stoppia vegnir tschertgà ina soluziun alternativa.
Ina prioritad per suenter 2045 fiss pussaivla per il tunnel da la Viafier retica a Fideris tranter Landquart e Claustra. Er a lunga vista betg prioritar è tenor il studi la construcziun nova da la N13 tranter Reichenau e Rothenbrunen cun il tunnel dad Isla Bella.