L'emprim la diagnosa: al pazient vai mal. Dapi la fin da la pandemia è l'industria da gieus stagnada. Ils ultims trais onns èn las cifras restadas lunsch sut las aspectativas.
- La svieuta da l'industria è sa reducida realmain – 13% pli pauc ch'il 2021.
- Ils giugaders passentan main temp cun games – dapi l'onn 2021 èn las uras cun games sa reducidas per passa 30%, ed i n'è strusch vegnì vitiers novs giugaders.
- Flops – sco per exempel il «Concord» che ha chaschunà ina perdita da 400 milliuns dollars – èn daventads pli frequents.
- Ils ultims onns èn vegnids serrads blers studios e relaschads var 40'000 persunas.
Raschun 1: Gieus per smartphones stagneschan
Il boom enorm che games han gì cun ils smartphones è stà in dals facturs ils pli impurtants per la creschientscha da l'ultima decada. Tals gieus han però pers lur schlantsch. Ils utilisaders existents dattan ora pli pauc (en ils Stadis Unids 27% pli pauc ch'il 2021) – ed els passentan bler pli pauc temp cun gieus. Cunzunt plattafurmas da video sco Tiktok, Instagram e Youtube concurrenzeschan ils gieus.
Raschun 2: Creschientscha repartida inegualmain
Tar las consolas ha surtut Nintendo procurà per creschientscha ils onns passads. La Playstation e la Xbox n'han betg pli pudì vender en cumparegliaziun cun ils models pli vegls ubain gudagnar novs giugaders. Nintendo-gamers sa cumportan auter: Els cumpran var 25% damain games novs, e circa la mesadad tar Nintendo.
Sin PCs è la creschientscha vegnida chaschunada cunzunt dal boom da gaming da la China. Gamers chinais na vulan u na pon dentant betg giugar gieus esters – passa 80% da la svieuta resta en il pajais. L'augment è pia vegnì repartì en moda fitg unilaterala, betg l'entira industria n'ha profità da quai.
Raschun 3: Pretschs e custs
Tar games èsi nunusità d'adattar ils pretschs da cumpra a l'inflaziun. Dapi ils onns 90 èn ils pretschs da cumpra reals sa reducids per dapli che la mesadad. L'industria ha bain empruvà da far sez anc svieuta en il game – per exempel cun vender costums virtuals u cun funcziuns supplementaras. Questas svieutas stagneschan dentant, perquai che las giugadras ed ils giugaders passentan pli pauc temp cun giugar.
Ultra da quai han cumpras entaifer ils gieus per consequenza dapli custs da svilup, perquai ch'in gieu sto vegnir provedì cuntinuadamain cun novs cuntegns. Ils custs da producziun èn explodids. In toc da blockbuster avant 15 onns aveva a disposiziun in preventiv da 50 milliuns francs – oz vegnan impundids 500 milliuns.
