A Tokio è il president da la Confederaziun Guy Parmelin sa scuntrà cun il primminister dal Giapun, Yoshihide Suga. En quel ha Parmelin intunà l’impurtanta dal Giapun per il commerzi svizzer. Da tut ils pajais en l’Asia fa la Svizra numnadamain il segund bler commerzi cun il Giapun. Las economias dals dus pajais hajan ferms lioms.
Il primminister dal Giapun ha er declerà, da vulair examinar intginas midadas en la cunvegna da commerzi. Quel datti dapi l’onn 2009. Suenter ch’il Giapun ha er fatg ina cunvegna cun l’Uniun europeica veglia la Svizra far intginas adattaziuns per meglierar l’access.
Panna cun l’aviun
Igl è stà l'emprim inscunter da Guy Parmelin – en il rom da sia visita dal Giapun. Dus inscunters planisads ier, cun l'imperatur Naruhito e cun il minister da l'exteriur, Toshimitsu Motegi, aveva el manchentà. L’aviun dal Cussegl federal aveva ina panna.
Il president dal Cussegl federal saja lura sgulà cun in aviun da lingia fin a Tokio. El era gest anc a temp per l’avertura dals gieus olimpics.
