Audiogalerie
Il venderdi a las 13:00 èn vegnids averts uffizialmain ils XXXII. gieus olimpics da stad en il stadi olimpic da Tokio. Pervi da la pandemia da corona han pli paucs atlets ed er be paucs invitads pudì sa participar a l'avertura.
Dals 23 da fanadur fin ils 8 d'avust cumbattan atlets ed atletas en il Giapun en 33 geners da sports per 339 sets da medaglias.
In retard da 364 dis
Atgnamain avessan ils gieus olimpics a Tokio gia gì dad avair lieu avant in onn. Sco bleras autras occurenzas èn er ils gieus vegnids spustads e la populaziun giapunaisa avess il pli gugent gist anc ina giada spustà ubain schizunt gist annullà quels. Er en il Giapun crescha numnadamain il dumber da novas infecziuns cun il coronavirus puspè.
Cumpareglià cun la Svizra èn las cifras en il Giapun bain anc bler pli bassas, la differenza è però tar il sistem da sanadad. Ina gronda part da las clinicas en il Giapun èn numnadamain clinicas privatas e quellas n'han pauc interess da prender si pazients da corona. Ultra da quai han ins entschet plitost tard cun las vaccinaziuns cunter Covid-19.
Impressiuns da la ceremonia d'avertura
-
Bild 1 von 3. Il fieu artifizial tutga er tar la ceremonia d'avertura. Bildquelle: Keystone.
-
Bild 2 von 3. Durant ina represchentaziun da saut èn ils tschertgels olimpics vegnids posiziunads. Bildquelle: Keystone.
-
Bild 3 von 3. In'ulteriura gruppa da saut giapunaisa. Bildquelle: Keystone.
Nagins aspectaturs
Quellas raschuns procuran per malsegirezzas tar ils Giapunais e las Giapunaisas. E qua sa chapeschi, ch'i n'è betg gist la meglra idea dad envidar l'entir mund da vegnir a Tokio a festivar ils gieus olimpics. Spetgads vegnan da quai da 50'000 visitaders. Er ch'aspetaturs ed aspectaturas n'èn betg lubids als gieus olimpics è donn per la populaziun ed oravant tut er per ils atlets e las atletas. Tals gieus vivan numnadamain er da l'atmosfera tras il public.