Ils gieus olimpics d'enviern dal 2030 na vegnan betg ad esser en Svizra, mabain en Frantscha. Quai ha il comite olimpic internaziunal IOC confermà mesemna saira. Er il 2034 vegn la Svizra a la curta. Lura èn ils gieus olimpics a Salt Lake City en ils Stadis Unids. Per il 2038 ha l'IOC dentant concedì a la Svizra in uschènumnà «dretg da preferenza».
I na saja bain pli tard che pensà, ma fetschia tuttina plaschair che la Svizra saja en discussiun per ils gieus 2038, quai ha ditg Viola Amherd envers SRF suenter la decision da l'IOC. Uschia possian ins approfundar il dossier olimpic e far in project fundà.
Er regenza grischuna beneventa ils plans
Semegliont tuni er tar il minister d'economia grischun Marcus Caduff. Er el beneventa vinavant ils plans per gieus olimpics d'enviern en Svizra. Er per il Grischun saja d'avantatg sch'ins haja dapli temp per l'entir dossier ed er per persvader la populaziun en chaussa.
Il plan eran gieus olimpics en Svizra il 2030 u 2034
Venderdi passà era il parlament da sport svizzer s'exprimì unanimamain persuenter da persequitar vinavant ils plans per ils gieus olimpics d'enviern dal 2030.
Nus fissan l'emprim pajais ch'è in pajais ospitant e betg mo ina citad per ils gieus olimpics. Quai avess in grond niz per la Svizra.
La Svizra avess gia ina infrastructura vasta per il sport d’enviern e gia duas giadas han ils gieus gì lieu a San Murezzan, il 1928 e 1948.
