Il 2026 è in onn da giubileum per Alberto Giacometti (1901–1966). En quest onn festiveschan ins ils 125 onns dapi sia naschientscha ed ils 60 onns dapi sia mort. Per quest'occasiun publitgescha la Posta svizra ils 5 da mars 2026 ina nova marca postala ad onur da Giacometti.
Alberto Giacometti (1901–1966) è stà sculptur, pictur e dissegnader svizzer ed è in dals artists ils pli impurtants dal 20avel tschientaner. Naschì è el ils 10 d'october 1901 en Bregaglia, en il pitschen vitg da Borgonovo sper Stampa, sco figl dal pictur postimpressiunist Giovanni Giacometti.
El ha vivì e lavurà a partir dal 1922 per gronda part a Paris, è dentant restà collià stretgamain cun sia patria, il Grischun.
La nova marca speziala per Alberto Giacometti è vegnida preschentada uffizialmain ils 4 da mars 2026 a la Chasa d'art a Turitg. Sa participads èn represchentantas e represchentants da la Posta svizra sco era spezialistas e spezialists da la Fundaziun Giacometti e dal sectur dal museum.
La marca cumpara quest onn per ses giubileums e mussa l'ovra «L'Homme qui marche I» (1960) – ina da las sculpturas las pli enconuschentas dal 20avel tschientaner.
Ina marca postala sco omagi
Il project è vegnì sviluppà ensemen cun la curatura engiadinaisa, Carolin A. Geist. Sia finamira è da render accessibel l'art e la cultura betg mo als spezialists, mabain da mantegnair ella visibla er en il spazi public.
Giacometti en il mintgadi
-
Bild 1 von 2. Marca postala per il giubileum dad Alberto Giacometti. Bildquelle: SRF.
-
Bild 2 von 2. Er la bancnota da 100 francs da l'onn 1995 ha gidà a render pli enconuschent Giacometti ad in vast public. Bildquelle: Keystone.
Uschia sco che la bancnota da 100 francs da l'onn 1995 ha gidà a render pli enconuschent Giacometti ad in vast public, duai er la nova marca postala render pli preschent l'artist en il mintgadi.
La marca postala è concepida sapientivamain en in format aut nunusità (20 sin 44 mm) – sco allusiun a las figuras lungas e satiglias da Giacometti. Quest format spezial fa resortir l'effect da «L'Homme qui marche I» e daventa ultra da quai in toc che dat en egl per collectadras e collectaders.
In'icona da la moderna
Alberto Giacometti è stà in dals sculpturs ils pli impurtants dal temp modern ed è in dals artists svizzers ils pli enconuschents en l'entir mund. El è naschì ils 10 d'october 1901 a Borgonovo en Bregaglia ed ha sviluppà a Paris ses agen stil incumparabel: figuras satiglias e fragilas che han influenzà fermamain il maletg da l'uman dal 20avel tschientaner.
Oz stattan sias ovras en blers museums impurtants ed en collecziuns privatas sin l'entir mund. La collecziun la pli gronda da sias lavurs sa chatta a Turitg. Là vegnan conservads communablamain ils effectivs da la fundaziun Alberto Giacometti, da la Chasa d'art da Turitg e dals amis d'art da Turitg. Questas collecziuns mussan lavurs da tut las fasas da la creaziun e rendan vesaivla la diversitad da si'ovra.