Siglir tar il cuntegn

Header

cuntegn

Giura u Berna Moutier decida il mars 2021 in'ulteriura giada tar tge chantun ir

La vischnanca da Berna, Moutier decida ils 28 da mars 2021 danovamain davart ina midada dal chantun Berna tar il chantun Giura. L'emprima votaziun è vegnida annullada pervi da irregularitads.

La data da la votaziun è stada il punct dispitaivel. Il chantun Berna ha vulì in termin da votaziun baud durant l'onn, fertant ch'ils separatists avessan preferì il termin dals 9 da matg 2021. Uss sajan ins sa cunvegnì a la data dals 28 da mars.

Decisiun stretga il 2017

Il zercladur 2017 aveva il suveran decidì cun 2'067 encunter 1'930 vuschs per la midada tar il chantun Giura – pia relativamain stretg. Silsuenter ha sco emprim la regenta da la citad declerà sco nunvalaivla la votaziun. Suenter ha er la dretgira administrativa dal chantun Berna confermà la decisiun, suenter ch'i aveva dà recurs.

Controllà dal chantun

La segunda instanza ha discurrì la stad passada da grevs surpassaments da lescha ch'ins haja commess enturn la votaziun. La dretgira ha tranter auter crititgà las reglas che hajan valì per la votaziun per brev. Er da lieus da domicil fictivs e turissem da votaziun saja vegnì discurrì.

En vista a la nova votaziun, controllescha uss il chantun Berna il register da votaziun da la vischnanca Moutier.

RTR novitads 11:00

Artitgels legids il pli savens

Scrollar a sanestra Scrollar a dretga