Per bunamain 5 mais èn las giaglinas stadas tschentadas ina sin l'autra. Pervia da las mesiras cunter la grippa d'utschels n'han las 100 giaglinas dal bain a Panaduz betg pudì bandunar lur stalla. Malgrà in curtin d'enviern èsi stà plitost stretg, la roda libra ha mancà, e quai ha chaschunà nauscha luna a las giaglinas.
Il terz mais han ellas cumenzà cun cannibalissem ed han cumenzà a piclar ina l'autra.
Per occupar las giaglinas ha il pur pendì si in crap da sal mineral ed in satg cun strom nua che las giaglinas han pudì piclar londervi. Ed ina giada ha il pur stuì serrar en las giaglinas en la stalla ed ha laschà ellas per trais dis en il stgir. Suenter saja la situaziun cun il cannibalissem meglierada.
-
Bild 1 von 5. Bildquelle: RTR.
-
Bild 2 von 5. Tar l'ultima grippa d'utschels ha Peter Barandun gia construì in curtin d'enviern per las giaglinas per avair dapli plaz e tuttina anc aria frestga. Enturn questa construcziun ha el construì ina rait da giatter per che nagins utschels na possian betg tutgar las giaglinas. Bildquelle: RTR.
-
Bild 3 von 5. Il satg nua che las giaglinas pon piclar londervi. Bildquelle: RTR.
-
Bild 4 von 5. Il crap da sal mineral nua che las giaglinas pon piclar. Bildquelle: RTR.
-
Bild 5 von 5. Bildquelle: RTR.
Nairas uras dad ir ora
Quellas dispitas duessan ussa avair ina fin. Il prim d'avrigl po Peter Brasser finalmain puspè avrir la porta da la stalla e laschar las giaglinas ora en il liber. Cura ch'il pur Peter Brasser avra la porta paran las giaglinas dad esser in pau surdumandadas cun la situaziun, ma i na va betg lung enfin ch'ellas cumenzan a currer ed a sventular. In mument spezial per il pur.
Jau di adina – sch'i va bain cun ils animals, lura va bain cun il par, e sch'i va bain cun il par, lura va bain cun ils animals. E quai è ussa bel da guardar ch'els dastgan puspè ir ora.