Siglir tar il cuntegn

Header

cuntegn

Gudogn independent 70'000 dumondas per cumpensaziun da corona

Fin uss ha in tschintgavel da tut las persunas cun gudogn independent fatg la dumonda per la cumpensaziun. Perquai che be persunas che han stuì serrar lur affar pon dumandar quella cumpensaziun, datti critica. Betg quitads ston percunter ils retschaviders d'ina renta d'AVS far.

En Svizra èn l'emna passada passa 70'000 independents s'annunziads per ina uschenumnada «indemnisaziun da gudogn da corona». Quai correspunda a radund in tschintgavel da tut las persunas en Svizra che lavuran sin agen quint, communitgeschan las cassas da cumpensaziun chantunalas.

Questas indemnisaziun pon persunas cun gudogn independent annunziar tar las cassas da cumpensaziun, sch'ellas han stuì serrar lur fatschenta sin cumond da la Confederaziun. Dumandar questa cumpensaziun pon dentant er persunas che ston restar sin cumond dal medi en quarantina u sche la tgira dals uffants sut 12 onns è sistida.

Nagin dretg sin indemnisaziuns han dentant persunas cun gudogn independent che pateschan bain da las mesiras rigurusas da la Confederaziun, pon però pratitgar vinavant lur professiun sco per exempel taxists u giardiniers. Quai chaschuna critica.

Rentas dad AVS èn garantidas

La crisa da corona ha er consequenzas sin l'assicuranza da l'AVS. Pervia da las pajas pli bassas van damain daners en las cassas. Las entradas vegnian a sa sbassar considerablamain, ha ditg il schef dal fond da l'AVS, Eric Breaval envers il radio SRF. Tuttina sajan las rentas segiradas e vegnian pajadas e quai betg mo l'avrigl, mabain er ils onns che vegnan. Nagin stoppia far quitads per sia renta.

Ils ultims onns sajan las expensas quasi stadas sin il medem nivel sco las entradas. Per cuvrir las perditas, stoppia il fond da l'AVS vender ina part da sia facultad d'investiziuns.

RTR, novitads 06:00

Artitgels legids il pli savens

Ir a sanester Ir a dretg