Siglir tar il cuntegn

Header

Maletg simbolic
Legenda: Moutier ha decidì: els vulan daventar ina citad dal Giura. Keystone
cuntegn

2'114 cunter 1'740 vuschs Moutier duai daventar ina citad dal Giura

Gia il 2017 è vegni vuschà davart da la midada da Moutier al chantun Giura. Pervi da suspect da sbagls n'ha Berna dentant betg acceptà il resultat. Uss han ils da Moutier confermà quella decisiun – cun 2'114 cunter 1'740 vuschs è la decisiun pli clera che la davosa giada.

Per garantir ch'il resultat constat, ha la Confederaziun giugà ina rolla impurtanta. Tranter auter han 16 persunas da la Confederaziun controllà la dumbraziun al lieu. Mintga cedla da votar aveva in ina filigrana ch'èra segira da falsificaziuns.

Conflict da plirs decenis

Il grond conflict da Moutier ha gia cumenzà l'onn 1947. Cusseglier guvernativ Georges Möckli vuleva surpigliar il departament da construcziun. La regenza chantunala da Berna na vuleva però betg el, e be perquai ch'el discurriva franzos e betg tudestg. Ils da Moutier sa sentivan adina dapli sco ina minoritad. Uschia s'han furmadas suenter il cas da Möckli gruppas da protest. Ils protests èn vegnids adina pli extrems. Ed ils onns 1970 eran ils protests uschè gronds che Berna ha stuì reagir cun tancs a Moutier. En la citad ardevan autos e chasas e sin via s'aveva catramà en ils binaris da tram.

audio
Da Berna tar Giura: La situaziun da partenza
04:37 min, Actualitad dals 11.03.2021.
laschar ir. Durada: 04:37 minutas.

Il 2017 han ins lura pudì votar sur da la midada dal chantun. Cun ina differenza da mo 137 vuschs han ils votants vuschà per la midada. La festa era per in mument gronda. Il chantun Berna n'ha però betg accepta il resultat. I haja dà sbagls, tranter auter pervia da persunas cun divers domicils che n'avevan gnanc il dretg da vuschar.

RTR actualitad 12:00

Artitgels legids il pli savens

Scrollar a sanestra Scrollar a dretga