Asen ni elefant, democrat u republican. Els Stadis unids da l’America è il foss tranter las duas grondas partidas politicas uschè profunds sco dapi decennis betg pli. Quai mussa in studi che l’universitad Harvard ha publitgà avant prest in onn. Nagina surpraisa per tgi ch’observa in zic tge che schabegia da tschai maun da l’Atlantic.
Tge rolla giogan las medias socialas?
Il medem studi mussa dentant era che la Svizra è gist sin plazza dus quai che pertutga la polarisaziun. Era tar nus crescha la part da la populaziun che na vul avair da far nagut cun persunas che han in auter maini. Las medias socialas giogan ina rolla impurtanta tar l’augment da la polarisaziun, di Lea Suter da Pro Futuris. Ella è co-mainaproject tar l’uniun Pro Futuris che vul promover la cultura democratica en Svizra.
Facebook, Twitter ni ils forums da lecturas sin las paginas internet promovan pia quella polarisaziun. Quai che fa donn a nossa democrazia, blochescha l’elavuraziun da schliaziuns per las dumondas impurtantas da noss temp. Nagin agid sajan en quella dumonda era tschertas furmas da debattar che hajan sco finamira da gudagnar, dominar e persvader uschè bleras persunas sco pussaivel da l’atgna posiziun, di Suter.
Sco alternativa propona ella perquai la furma dal dialog mediativ che na focuseschia betg en emprima lingia sin tge ch’ina persuna di, mabain sin il pertge ch’ina persuna ha ses opiniun.
Respunder diesch dumondas
E promover gist quai barat vul Pro Futuris cun ina emna da dialog a Basilea cun il num «Lasst uns reden». Persunas interessadas pon s’annunziar sin la pagina internet e respunder diesch dumondas. Per exempel duai la Svizra investir dapli en l’armada ni duain las canortas per uffants esser gratuitas. In program selecziunescha lura duas persunas che han in different opiniun tar quels temas e quellas pon lura s’inscuntrar en in’ustaria per discutar ina cun l’autra.
Finamira saja d’emprender d’enconuscher meglier e d’eruir pertge che tschella persuna patratga uschia sco quai ch’ella patratga. Ina sort experiment pia che pretenda dad omadus partenaris da discussiun dad esser averts, tadlar e reflectar.
Basilea na duai betg esser sulet
Enfin ils 21 da matg pon persunas da la regiun Basilea s’annunziar sin la pagina internet lasstunsreden.ch. Ils discurs en gruppas da dus han lura lieu entschatta zercladur. Basilea na duai dentant betg restar il sulet lieu. Tenor Lea Suter avessan els plaschair ed gust da cuntinuar cun quest project era en autras regiuns da la Svizra. Forsa era el Grischun.
