Siglir tar il cuntegn

Header

audio
Per tadlar: App per medi da chasa
Or da Actualitad dals 20.05.2023. Maletg: Dodacom.ch
laschar ir. Durada: 3 minutas 29 Secundas.
cuntegn

HelveCHia: Losanna Medi sin empustaziun cun app

A Losanna èsi pussaivel d'empustar via app in medi per ina consultaziun a chasa. Tuts n’han dentant betg plaschair da questa nova offerta.

Docadom, quai munta «docteur a domicil», medi a chasa. Quai è il num da l'applicaziun ch'in e scadin avdant e scadina avdanta a Losanna po chargiar sin ses telefonin. E quai è era l'idea davos Docadom. Cun paucs clics descriver ils sintoms e sche necessari empustar in medi per ina consultaziun sperta a chasa. Lantschà l'offerta han dus medis. In dad els è Alexis Bikfalvi. «Nossa finamira è da porscher consultaziuns d'urgenza en quests cas nua ch'il pazient na po betg ir tar ses medi da chasa. Sch'il cas n’è betg critic e na pretenda betg in tractament en l’ospital faschain nus era gist la consultaziun tar el a chasa.»

Il servetsch stat a disposiziun set dis per emna, mintgamai da las 10:00 enfin las 20:00. Actualmain sajan trais medis emploiads tar els ed il servetsch vegnia surpiglià da la cassa da malsauns, di Bikfalvi. L’effect positiv saja in meglier provediment da la sanadad a Losanna ed ina distgargia da las recepziuns d'urgenza da clinicas ed ospitals, di el.

Animation der docadom-App
Legenda: docadom.ch

Tema da la «uberisaziun»

Tuts n’èn dentant betg persvas dal servetsch nov e teman ina sort «uberisaziun» da la medischina e dubitan ch'il diever da quella tecnologia portia propi ils avantatgs empermess. In dad els è Pierre-Yves Rodondi, il manader da l’institut per medischina da famiglia a l'Universitad da Friburg. «Nus avain qua in sistem pulit tecnic che mo ina part da la populaziun po duvrar. Per pazients pli vegls n’è il diever da l'app betg uschè simpel. Ultra da quai custan consultaziuns a chasa dapli che quellas en la pratica. Quai ha lura er in effect sin ils custs per ils pazients e per il sistem da sanadad.»

Enstagl da promover ina app fissi bler pli prudent ed effectiv d'augmentar il dumber da medis da chasa, è el persvas. «Sch'ins po tgirar bain in pazient er a lunga vista vegn quel a consultar pli pauc las recepziuns d'urgenza. Sch'ins augmenta dentant mo las capacitads d'urgenza senza augmentar il dumber da medis da chasa cuntinuescha la crisa actuala ed ins augmenta mo ils custs per il sistem da sanadad.»

Chantun ha dà glisch verda per project

Il chantun Vad ha qua dentant pli paucs dubis quai che pertutga il sistem per clamar in medi a chasa via app sin il telefonin. Anzi. Tenor Karim Boubaker, il medi chantunal dal chantun Vad èsi ina purschida interessanta ed innovativa. Tema che la purschida nova augmentia ils custs dal sistem da sanadad n’ha el betg. «Jau crai ch'ins sto simplamain avair pazienza, observar e guardar co la populaziun reagescha sin ina tala purschida. E quai è era la raschun pertge ch'ils medis pertutgads èn vegnids ed han preschentà lur project al departament.»

Alexis Bikfalvi, in dals dus fundaturs da Docadom, è en tutta cas persvas che lur purschida chatta buna accoglientscha. Els planiseschan gia da schlargiar lur offerta sin ulteriuras regiuns enturn Losanna. 

RTR actualitad 07:00

Artitgels legids il pli savens